(新增內容)
今屆無綫貼地港姐選舉已曲終人散，去屆冠軍雷莊兒都疊埋心水、準備返加國做OL，終極目標係向荷李活發展咁啦。至於今屆落選嘅佳麗工藤佑采卻因為「黑面」同「hea跳」而成為焦點，結果佢都忍唔住喺ig回覆網民稱：「阿媽生到我咁我都冇法子。」此言甚是。
有網民發現，其實工藤佑采自參選以來，都係keep住佢冷若雪櫃、木無表情嘅風格，但到決賽當晚，明明已經出局，但都要再次出場，同其他落選佳麗一齊跳舞。將心比己，如果換咗係你，out咗出局喇喎，仲要再出嚟幫人贈興喎，而且仲係足足三次喎！黑面／冇表情／hea跳，可以理解。有問題嗰個，唔係佢，而係大會呢個咁殘忍嘅安排。
今日有周刊報道就爆料稱，決賽當晚，已落選嘅工藤佑采於後台曾拒絕出場做佈景板，令工作人員束手無策。最後幾經幕後人員鼓其如簧之舌係咁曉以大義，最後工藤佑采才肯上台。
周刊亦搵咗港姐監製何小慧求證，何稱工藤佑采綵排期間已經唔認真，又指賽前大會已經勸告過佢，搵埋dancers同佢一齊練，但何小慧稱工藤一直keep住hea。
何小慧表示，呢個落選港姐做佈景板安排一早已有，她意有所指謂工藤佑采可能覺得自己一定入圍，所以練呢part舞期間冇點認真練喎。咁點解要咁殘忍「明明死咗」（即出局）都捉番班落選佳麗上台娛賓呢？何小慧解釋係因為唔想一眾落選佳麗要苦等到完騷先可以再出場，「希望大家可以一齊參與成晚嘅節目」喎。
據工作人員同《蘋果》透露，工藤佑采本身態度好有問題，工作人員好聲好氣建議佢才藝表演不如唔好拉小提琴改做第二樣嘢，工藤佑采完全唔聽，更揚言：「得㗎喇，我到時拉到㗎喇。」工作人員話工藤佑采經常對人黑口黑面，講說話經常一句「duck」埋嚟，亦鮮有同其他佳麗溝通。而大台之前叫班女仔喺官方app開live，工藤佑采一開就有幾十萬個心心，班工作人員都覺得好古怪。
工藤佑采就喺ig回應：「TTv都幾有趣～個處理方法都幾好喎丶我幾時有拒絕過落選之後要上台跳舞？我哋幾個落咗選嘅女仔包括我在內，明明喺後台哭完都上台跳舞！講到好似佢哋束手無策咁！」又寫道：「好辛苦先叫到我上台？唔鍾意我都唔使（抹）黑我0架～ TTv比賽咁多奇怪事情我都冇講出嚟，比賽最後一個星期 要冇跳舞底嘅我哋學四個舞～你期望可以跳到dancer咁。TTv根本就是，佢唔要你丶都唔俾生路你行～」
有網民為其抱不平，工藤佑采怒道：「我認我天生poker face笑容少，可能講嘢仲有啲串 ～但是我做人仲有品格。」、「佈景板原來需要有笑容」、「都冇當我哋係港姐丶Dancer都唔係丶我哋係佈景板。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|