【20:43】
下半場踢咗大約12分鐘，拉舒福特入替域陀連迪路夫，曼聯準備全軍搶攻喇！
【20:17】【半場完】韋斯咸 2:0 曼聯
曼聯今場有盧卡古、馬迪爾同普巴攻堅，但球隊攻勢麻麻，上半場只有盧卡古頂中柱較具睇頭，普巴幾次想個人突破都唔成功，仲畀對手連波都偷埋。韋斯咸上半場演出唔算突出，但就頗具運氣，領先2球相信連佢哋都唔信。落後兩粒，曼聯換邊後已冇退路，睇吓班波谷唔谷得起。
【20:13】韋斯咸 2:0 曼聯
43分鐘，曼聯連運都輸埋，耶莫蘭高左腳一抽省中連迪路夫彈入網窩，紅魔輸到0:2
【20:02】
踢到32分鐘，曼聯攻勢都幾單調，只靠楊格右路出波，韋斯咸唔難應付
【19:53】
23分鐘，楊格右路出波，盧卡古頭槌頂中柱，曼聯運都冇埋仲落後緊
【19:45】
15分鐘普巴殺入禁區，但畀盧保偷咗個波，仲畀對手扭嚟扭去玩到謝。
【19:36】韋斯咸 1:0 曼聯
韋斯咸右閘薩巴列達有越位之嫌下在右路橫傳，菲臘安達臣近門後腳射入，打開紀錄。
【19:30】
韋斯咸主場對曼聯開波喇。
【18:40】曼聯作客韋斯咸陣已出，領隊莫連奴強陣出擊，其中盧卡古將同安東尼馬迪爾攻堅，同寸王有拗撬嘅保羅普巴亦首發出場。不過逗緊天價人工嘅阿歷斯山齊士就做後備，睇嚟寸王都開始對呢位陷入球荒嘅前鋒失去信心。
韋斯咸正選陣容（4141）
門將：1法比安斯基
後衞：5薩巴列達、4法比安巴貝拿、23伊沙迪奧普、26馬蘇亞古
防中：41迪格蘭賴斯
中場：20耶莫蘭高、16麥克盧保、14奧比安、8菲臘安達臣
前鋒：7阿拿奧杜域
曼聯正選陣容（4312）
門將：1迪基亞
後衞：18艾舒利楊格、12基斯史摩寧、2域陀連迪路夫、23勞基梳爾
中場：31麥湯米尼、27尼曼查馬迪、27費蘭尼
攻中：6保羅普巴
前鋒：9盧卡古、11安東尼馬迪爾
星期六又有英超睇，今晚曼聯、曼城打頭陣，去到深夜12:30仲有榜首大戰車路士對利物浦，英超球迷一定好期待！陪大家食晚飯嘅有紅魔鬼，呢支風頭躉會作客韋斯咸，紅魔鬼近兩場表現曳，先於聯賽畀狼隊逼和，跟手於英聯盃仲畀英冠仔打比郡踢出局；相反錘仔幫上輪聯賽和到車路士，呢次又試主場出擊，唔知會唔會又令紅魔鬼失分呢？
之後10點有曼城主場對白禮頓，藍月亮近兩場全勝一共攻入8球，今場分分鐘又係入球騷。去到深夜有戲肉車仔主場對紅軍，兩軍剛於英聯盃對撼，夏薩特射入世界波踢利物浦出局，仲打斷紅軍7連勝勇勢，今場高普必定有仇報仇，肯定有好戲睇！
東網體育FB同你追實體壇每個精彩時刻！
http://bit.ly/2ecTF2A
|
鍾意就快D Share啦！
|
|
|