時下環保議題流行講「走塑」，不少食肆推行「無飲管日」，但面對堅持要取飲管的客人，隨時惹來爭拗。近排網上流傳一段影片，指有食客在麥當勞一家分店取飲管不成，大罵職員，結果被反罵至敗走。
據網民形容，事發當日為星期一，正值麥當勞「無飲管星期一」，店員不會主動提供飲管，一名西裝男取飲管不成，破口大罵。
「你乜嘢態度呀！你現在乜嘢態度呀！」
「喂！現在是他做錯嘢！」
面對這位暴躁西裝男，該店男職員表現得頗不客氣：
「咁你想點呀？咁你想點，我問你！」
「係呀，唔畀鬧咖，唔畀講粗口咖，點吖！」
到西裝男一度爆粗大罵，男店員態度依然沒有退讓。
「嘈完未呀？走仲想點呀！」
「企喺度吖！你慢慢企！」
最後，西裝男拿着相信載有外賣的紙袋，轉身離去。
有關短片上載短短一天，即有數以百計分享，網友們都冷嘲熱諷西裝男態度差劣，亦有人取笑他只係聲大大「得把口」：
「咁巴閉唔好出街食囉。」
「點乜鬼呀？係有料早就開咗波啦，邊有咁多嘢點。」
「得把死人聲，有問人甚麼態度，又話人大聲，全程沒重點。」
不過，亦有花生友「各打五十」，話快餐店食物不健康，不應多吃：「支持唔用膠飲管，更加支持唔食垃圾食品。」
香港麥當勞向本刊證實，今次爭執於週一在旺角店發生。發言人未有直接評論事件，只表示前線員工會檢討與顧客應對的溝通技巧，以更有效處理店內突發事件。
撰文：忻肇康
立即下載Apps，隨時隨地睇盡時政專題、深度偵查、娛樂熱話！按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|