有流傳消息指，周星馳為趕得切2019年賀歲檔期有新戲面世，正密鑼緊鼓拍攝《喜劇之王2》，而主要演員有王寶強、姚晨、林允等。雖然消息未經證實，但林允微博已post出刨劇本相，但偏偏要幫劇本打格，仲唔係此地無銀？
其實點解咁趕，要3個月內速拍《喜劇之王2》？據知星爺嘅《美人魚2》有大量特技，後製需時趕唔切賀歲，唯有轉陣推出2015年已經搞掂劇本，可以慳唔少時間嘅《喜劇之王2》。唔只咁，為咗3個月達標，監製星爺更搵嚟出名「少超支、少超時」嘅邱禮濤做導演。
至於演員方面，《喜劇之王2》2015年曾經選過秀，但今次時間緊迫，直接搵嚟喺內地有「新喜劇之王」美譽嘅王寶強孭飛。又難怪，王寶強今年兩部新戲已經狂掃55億港紙，實力、叫座力無庸置疑。仲有近年成為品牌新寵，亦係「星女郎」嘅林允，星爺實預埋佢。至於女主角姚晨，曾經獲美國《時代》雜誌列為「百大最有影響力人物」之一，有一定名氣、影響力，但當年張栢芝好似初戀一樣深入民心，姚晨又能唔能夠比美或突破呢？拭目以待！
來源 source: http://nextplus.nextmedia.com
|
鍾意就快D Share啦！
|
|
|