前DJ洪朝豐去年10月證實患舌癌，需要進行切除舌頭手術，之後癌細胞擴散至淋巴，再證實患淋巴癌，雖然不幸患癌，但佢都積極面對，仲不時透過社交網發長文講及患病感受。今日洪朝豐再喺社交網以《是癌病復發了麼？》為題發表長文，開首已經話：「我很快，便會知道，我的癌病，是否已經，悄然，復發。如果醫生說，可以做手術。我會去做手術。如果說，已經擴散，不能做手術，我會尋找另類療法。倘若沒有療效，我會等待死亡，靜靜的。死亡，並不恐怖。死亡前的疼痛，才恐佈。我希望自己臨死前，免於這個折磨。那是一個，美好的願望。」
佢仲話較早前同前妻去倫敦探望兒子，前後去咗兩星期，尋日先返港。佢記得臨行前，醫生嘅語氣好嚴肅：「他一共問了我三次，意思是說，是否更改出門日子，或者取消出門。這樣，就可以早點用粗一點的抽針，再次抽我右頸腫起的淋巴核的活組織，拿去化驗。因為上一次的抽針，只能抽到血液，沒有抽到活組織。然後，還要再多照一次超聲波。」佢當時就問醫生：「如果是癌症復發，便可以早點做手術麼？」醫生點頭示意係，但最終佢都決定如期出發，佢話去到歐洲後，每日都過得好快，同前妻玩得好開心。
佢回想大約兩個月前，突然發現右頸某處腫咗一塊：「我心裏很害怕。怕的是癌症復發。記得醫生説過，一般復發，會在手術後頭一年，或者第二年。我是九個月前做的手術。會是我麼？會是我麼？除了舌頭的手術外，我左邊的頸項也做了手術。醫生取出二十四粒淋巴核，其中四粒，發現有癌細胞。今次，是從左邊轉移到右邊了麼？我的心開始慌亂起來。是我麼？是我麼？終於，我去了政府診所，看普通科醫生。醫生確診是淋巴核的問題。她問我：『痛麼？』『痛。』『一般而言，如果裏面有癌細胞，是不會痛的。』她開了七天抗生素給我。一邊吃，疼痛減少了，但淋巴核愈來愈腫，由原來的一釐米，已經腫脹到一元硬幣那麼寛。我的心是愈來愈沉重了。」最後佢等到返醫院覆診嗰日，耳鼻喉專科醫生確診是淋巴核出問題之後，然後係抽針，要九日後返去覆診睇報告。終於等到覆診日，當時佢仲同前妻講有啲緊張，不過去到醫院後，醫生就話上一次抽針只抽到血。所以要再抽一次，又叫佢去私家醫院自費做正電子素描，於是佢出門去歐洲前兩日，就去咗私家醫院做素描，到依家都未知結果。
文尾洪朝豐話行到如今呢一步，吉凶未卜，就睇上天意思，並領悟到可以健健康康，無病無痛，渾渾噩噩過日子，已經好幸福。
及後，洪朝豐回覆東網說：「未知，本來今日可以到醫院拎檢驗報告，但因為去完歐洲個人比較攰，所以諗住聽日先去，因為下星期我先會見到之前幫我做手術嘅耳鼻喉醫生，所以我拎咗報告都未必識睇。」本來醫生待他返港，就約好幫他再抽一次組織化驗，怎知他竟然因時差問題而搞錯日子，他說：「世事真係好橋，醫生問我幾號返，我話9號，咁佢就約我10號，但9號我先喺巴黎飛，因時差我尋晚先到，今朝先知自己搞錯。」
問到他是否真的好擔心？他說：「我覺得已過咗擔心嘅時間，正如我喺社交網所講兩個月前發現勁部腫起，我真係驚復發，但經過兩個月到咗呢一刻，我已由驚變咗唔驚，因為起起伏伏，我比較能夠隨遇而安，如果有咩都係整定，要開刀就開刀，如果話抗散咗冇得開刀要等死，我都會驚病痛、驚死，但我都冇乜遺憾，因為我已經贏到咁多人寵愛，當然我都希望冇事，期望唔係復發。」
|
鍾意就快D Share啦！
|
|
|