做過大台嘅，都話大台人工奀、刻薄。由藝訓班至今39年，李成昌最有資格批評！但，佢選擇多謝，因為「我喺tvb咁多年，機會好多，公司俾好多機會我」，而且「我第三年嘅人工已經係加到百分之一百二十幾，真係好開心，多謝多謝」，更何況「我第一架車，第一層樓，就係做香港八一系列返嚟嘅」。
問到昌哥點解會入行，佢答「興趣」，講完自己都笑。怕人唔信？定係驚人笑佢「興趣唔可以當飯食」？而事實係，佢5年班已經做短劇扮耶穌；中學做義工搞兒童劇班，擔任埋導師；畢業後考唔到香港話劇團，悶住打份銀行工，一放工就去睇話劇。終於等到藝訓班，未分得清舞台劇同劇集、演員同明星，考咗先。就係咁入咗TVB，「晚晚喺公司瞓，啲pa問你陣間得唔得閒呀？得閒就開工啦。捱咗成年幾，俾馮淬帆監制，搵我做《烽火飛花》，秋官做主角。可能嗰套嘢俾珍姐睇中咗我做大陸仔，就入去做《香港八一》，點知一做就做咗5年，咁就爆show喇！令到我康仔行出街呢，好開心好多人識，好多你哋啲傳媒訪問。我第一架車，第一層樓，就係做《香港八一》系列返嚟嘅。」
2012年，李成昌55歲，喺TVB服務咗33年，終於有個「傑出演員獎」，外界視之為好聽啲「安慰獎」，唔好聽「豬肉獎」。不過，昌哥覺得，比起「最佳男主角」、「最佳男配角」等「最佳」獎，更加值得拎。因為「最佳」，講緊得獎者喺某一套劇演得「最佳」，好過晒其他人，但「傑出演員獎」就唔同講法，「由我入行至到我拎獎呢段期間，大家、公司都認為呢個演員係最傑出嘅，一路以嚟都係，所以我拎呢個獎時真係好開心。」
呢個，就係「阿昌精神」。難怪97年TVB要求停薪留職、共共渡時艱，佢OK；11年王維基銀彈攻勢挖角搶人，佢Stay。甚至近年TVB被彈、被睇淡，佢都話：「我相信公司會改嘅，TVB而家其實劇本、拍攝製作係進步咗。我相信公司決策嗰啲呀，一定會諗掂佢。」
昌哥份人，真係好從一而終！對TVB係、對屋企人係、對演藝事業更加係！「廿幾三十年前試過搞過製作公司，我已經感覺到上面可以登台，或者接啲show、event，嗰時未興架！但後尾我發現我去搞唔得，除非我拋開咗演員唔做，所以就搞唔到。又試過有人搵我搞火鍋，我又係發覺，如果我個心一離咗去嗰度呢，咁又唔得架喇，所以一路至到而家都無搞生意。」兩個字：佩服。
採訪：梁子健
攝錄：黃志明、吳斯金
來源 source: http://nextplus.nextmedia.com
|
鍾意就快D Share啦！
|
|
|