有「大美人」之稱的關之琳多年來緋聞無數，情路多姿多采。自從三年前跟第二任丈夫陳泰銘離婚後，關之琳暫時跟緋聞絕緣，早前她接受《蘋果》專訪時，自言以往的感情生活是「一塌糊塗」，她更坦言：「拍過拖、結過婚，覺得原來同一個人生活係咁難。」被問到會否生兒育女，她笑說怕下一代是找她報仇。
採訪：栐仁
攝影：小青
現年56歲的關之琳經歷過兩段婚姻，多年來緋聞男友無數，而且男主角不是富豪就是型男，羨煞不少港女。關之琳日前在上海接受《蘋果》專訪，她亦不諱言自己享受被人追求的感覺：「我係好吸引人，唔只異性，嗰啲係飄過嘅嘢，我覺得我好吸引人嚟搵我，所以我會遇到好多機會，但要睇我識唔識把握。」
| | |
對愛情厭倦
回首半生，關之琳會如何形容自己的感情世界？她想都不用想就衝口而出：「一塌糊塗！可能呢個係我嘅命，我嘅性格好執着，令到唔係好多人咁愛我，我要求嘅完美係冇㗎囉，所以活喺一個唔係現實嘅世界上。」即是她由始至終對感情都要求完美？她說：「係呀！其實冇㗎！我見到人哋可能表面好靚，其實好多嘢發生，我自己到𠵱家都發緊夢，𠵱家都一盆冷水潑咗落嚟，醒一醒啲，但我嘅感情都幾失敗，唔識handle。」
難道關之琳不可以稍為遷就一下現實嗎？她苦笑道：「冇辦法，改唔到，我情願冇，亦唔情願遷就。享受一個人，瞓一張床幾舒服，唔使顧嗰個人，要就啲細節嘢其實好攞命。拍過拖、結過婚，覺得原來同一個人生活係咁難，所以一個人幾開心！」
關之琳又自評不是好女友：「我要去了解一個人起碼五年以上，先可以了解同配合，過咗呢段時間耐性又減低咗，所以我唔係一個好好嘅女朋友。𠵱家嘅愛情觀都變咗少少，我好自閉，除咗做嘢，就係返屋企、做運動，運動係我最大享受。」
跟前夫陳泰銘三年前離婚後一直單身，關之琳直認對愛情仍有陰影：「嚟到就嚟，好合眼緣都要睇性格，如果性格唔啱，真係好對唔住，我冇辦法就佢，所以𠵱家一個人，暫時都幾好。我有時都好驚，希望唔好出現住，出現咗咪又要嚟過？算喇，真係好攰喇。」關之琳一向有「大美人」之稱，她有否想過留下美麗基因，生兒育女呢？她坦言想過：「曾經諗過，但我驚最唔好嘅留咗畀佢就仲煩，嚟報仇！唔好喇，我成日好負面，所以唔會生。」
最鍾意舉重
既然決定不留下美麗基因，那麼關之琳更要好好保養，將美麗延長。自認貪靚的她笑說：「我好緊張保持我嘅身形，對我嚟講運動係最重要嘅一樣嘢，可以排汗、排毒，對身體健康好重要，其他就係食嘢要小心，好少食到好飽，小心食任何嘢。」
想不到外表纖瘦的關之琳，原來最愛舉重：「一星期做五日運動，留番兩日自己時間，因為一做就要做三個鐘，我鍾意做心肺運動同舉重，我鍾意個過程。咁樣令我覺得好舒服，一身汗，同埋感覺啲汗排咗好多毒。」關之琳自言必需要有充足睡眠，不過她對天然衰老已有心理準備：「自己好緊張健康同身形，呢個最基本可以做，面就冇辦法，佢要老就老，點樣變化都冇辦法，順其自然最好。」
EQ高最緊要
除了做運動來保持身體健康，心理健康亦很重要。娛樂圈是非多，關之琳亦遇過不少，但她從不放在心上：「我鍾意低調啲，我唔鍾意是非，但是非偏偏會嚟搵我，好多是非、好多唔好嘅，但我EQ高，我覺得唔係真嘅做乜要講咁多箒，自己心知、天知、地知，我冇做係咪？有啲朋友會好竧，我覺得越解釋咪越煩，所以做呢行要有呢個忍耐先得。」她笑言有時也會安慰自己：「心裏冇做到咪得囉，我個人成日好儍，諗啲人可能妒忌我，所以會有咁嘅報道，就係咁諗，咪開心囉。」
|
鍾意就快D Share啦！
|
|
|