茹素半年，50歲「馬神」馬德鐘瘦咗10幾磅，但其實佢一向身形都好弗，再走贅肉，整個人感覺好fresh。馬神話今年初，有感人到中年，應該吃得健康，佢突然改變飲食習慣，由多菜少肉開始，無論喺屋企定喺大陸開工，馬神都會「大廚出馬」，為自己炮製素餐，佢現時已甚少外吃，希望食得健康。
馬神想教大家煮西式素餐，佢日前就走入廚房，教大家整蕃茄香草多士（Basil Tomato Crostini）同美式芝士通心粉（Mac and Cheese），蕃茄香草多士係一個清新前菜，佢將蕃茄同紫洋葱切碎，再拌上橄欖油同香草等調味料，放上烤好多士上便可以。另一款美式芝士通心粉就先煮淋通粉備用，再用油炒香蒜茸及洋葱碎起鑊，因唔熟習環境，稍有失手，佢都不忘自嘲，其後所有步驟都順利，佢加入菇粒及南瓜茸，煮成醬汁倒入通粉上加芝士，放焗爐5分鐘，兩味素菜做法都非常簡單。馬神事後品嘗製成品，食得滋味。
馬神今年初開始轉食素：「想身體健康啲，食入口嘅嘢最重要，唔係完全停晒，有時要出去應酬，同朋友聚會，揀選嚟食，基本上唔食肉，有時食少少海鮮。唔食肉，各方面配合，令自己身體狀態同皮膚都健康啲同好啲，咁多好處，諗唔到點解唔咁做。」以前係「牛魔王」嘅馬神，無牛不歡，要戒就要逐少逐少減，「人嘅慣性，一下改變幾辛苦，點令自己成功，咪做啲好好食嘅健康食品。素菜都畀到足夠體力，我最鍾意食紫洋葱，不論生食熟食，我無論煮乜都會加，有時大陸拍戲，我返酒店都自己買嘢煮，有時涼拌，有時炒個意粉，煮嘢食係樂趣。食多啲蔬菜水果，腸嘅負荷唔使咁辛苦，食完第二日唔使好多嘢頂住個肚，起身個人都醒唔到。呢半年，我嘅體重重輕咗10幾磅。」
馬神自覺茹素後，個人「清新」咗，佢連咖啡同酒類飲品都戒埋，佢覺得飲咖啡要加奶，但牛奶都由牛度出嚟，所以索性戒埋。酒類其實最致肥，除卻應酬，馬神盡量係滴酒不沾，所以飲食配上適當運動，馬神身形更弗爆，外型跟真實半百之齡完全唔相似。
採訪：陳杰
攝錄：葉君海、林賓尼
場地：The Stadium（CWB）
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|