出道30年的黃翊，前晚在九展首次舉行個人演唱會，他在台上激動地表示:「等咗呢刻超過30年！」黃翊家姐及兒子亦有到場跟他分享喜悅，不過一直與黃翊甘苦與共的太太陳存正就未能現身，原來正輪候換腎的陳存正近日曾嘔到一床血，又昏迷9天。黃翊在台上直呼：「真係好驚，狀況好難搞。」幸好太太現已蘇醒。
因為去年在無綫音樂節目獻唱，令黃翊回到公眾視線，他亦再次燃起對音樂的熱情，前晚黃翊在九展舉行出道30年以來首次個人演唱會，全場爆滿。甫開場黃翊已經與dancers又跳又唱，然後他激動地說：「等咗呢刻超過30年，由86年參加《新秀》到𠵱家！」黃翊亦不忘呼籲觀眾不要吝嗇掌聲：「冇唱歌成25年，自己好懷念唱歌嘅日子，畀10秒我感受吓呢30年久違嘅掌聲！」台下觀眾即時歡呼。
其實黃翊最大的支持者，當數多年來與他甘苦與共的太太陳存正。前晚黃翊家姐及囝囝Wesley都現身撐場，不過就缺少了患有腎病的黃太。黃翊與黃寶欣合唱《酒杯敲鋼琴》後，黃寶欣在台上解畫：「黃太近日身體唔好，其實兩個星期前佢喺深切治療部昏迷咗9日，但黃翊一直撐住，好彩嘅係，幾日前已經醒番！」黃翊補充說：「佢𠵱家越嚟越好，令我可以專注唱歌。」
搵觀眾打氣
黃翊表示有朋友問他會否取消演出，但他堅持繼續：「演唱會已經準備得如火如荼，唔係話唔會為太太而取消，但我又唔想捨棄3,000個歌迷，所以繼續演唱會。」後來黃翊到台下借兒子的電話拍片給太太，又叫觀眾們一齊向他太太講加油，再隨即唱出為太太寫的新歌《愛到底》，其間台上播出一家三口合照。
完騷後，黃翊接受傳媒訪問說：「太太10月9號喺屋企昏迷，真係好驚，狀況好難搞。我見佢嘔到成床都係血，真係嚇死人，惟有即刻叫救護車送佢入醫院。」太太入院後被送往深切治療部，黃翊憶述：「醫院幫佢照勻全身，怕佢內出血，結果原來係佢昏迷時抽筋，咬損咗條脷，所以流咗咁多血，亦好好彩開騷前幾日醒番，令我好放心咁演出。」黃翊續稱太太的情況日漸好轉：「當然起初醒番嗰陣，佢好冇精神，但經過呢幾日已經康復得好好，仲可以同我講電話。」
妻輪候換腎
黃翊又言這段時間太操勞：「今日把聲都唔係最佳狀態，希望觀眾體諒。」其實陳存正一直輪候換腎，但黃翊自言等到換腎的機會不大，故計劃安排太太去內地接受手術。個唱尾聲時，黃翊問若再開騷大家會否支持，有不少觀眾大叫「紅館」。那麼他下一步是否進軍紅館？黃翊說：「如果再有機會當然係好事。」
採訪：曹家誠
攝影：陳俊強
|
鍾意就快D Share啦！
|
|
|
