再戰樂壇的黃翊前晚於演唱會上被踢爆，一直患腎病的太太陳存正早前昏迷9日以致未能現身撐場。愛妻如命的他，其實於太太昏迷前經常有影皆雙甚為恩愛，他還駕電單車與太太外出撐枱腳，而太太入院後他亦頻頻往返醫院探望，更打理家頭細務一腳踢。
現年50歲的80年代歌手黃翊，前晚在九展舉行入行32年來首個個人演唱會《黃翊最愛的你演唱會》，期間被舊愛黃寶欣踢爆兩星期前其太太陳存正於深切治療部昏迷了9天，直至幾天前才甦醒。與太太相依相守17年的黃翊，曾承諾會永遠守護她，即使她去年因輕微感冒以致腎病復發，需要每晚洗腎十個鐘，還因服食西藥和類固醇而出現水腫，最嚴重去到160幾磅，其身體亦難以自行排毒，毒素指數超過一千，情況嚴重，但夫妻二人依舊恩愛，互相扶持。
屋企舖頭一腳踢
本報早前拍得陳存正昏迷前與老公甜蜜外出撐枱腳，當晚黃翊駕電單車接載太太離開大埔寓所，前往附近食店醫肚，難得撇下兒子二人世界，夫婦邊食邊傾，陳存正當晚胃口甚佳，見她大啖吃不停，逗留近一小時才離開。取車時陳存正以老公的膊頭借力踏上電單車，黃翊見狀即輕扶太太。事隔數天，陳存正就昏迷入院，黃翊也頻頻撲撲出入醫院探望愛妻。當日他出席活動後，即急急腳返回寓所，並於屋外收衫及整理雜物，做完一輪家務後，憂心忡忡的他手持大袋食物，駕電單車往附近醫院探望太太，逗留約兩小時才離開，再往大牌檔幫手至深夜回家。
甦醒有番意識
黃寶欣踢爆其太太昏迷，黃翊完騷後接受訪問，他說：「太太10月9號喺屋企昏迷，真係好大件事，嚇死我，即刻叫救護車送佢入院。醫院即刻照佢個腦，驚佢爆血管，因為我發現佢昏迷時，見到成床都係血，唔知點解佢會嘔血，所以就照，驚佢內出血，但照完之後乜事都冇，原來係佢昏迷時抽筋，咬到條脷，所以流咗咁多血，幸好開騷前幾日太太終於醒番！起初醒番佢好瘦，冇氣冇力，但依家已經可以同我講電話，康復進度十分理想，好開心可以喺演唱會前有番意識，唔使有牽掛。」
他表示太太出事時十分擔心：「演唱會又準備緊，有朋友問我會唔會取消，但我又諗籌備咗咁耐，唔係話唔會為太太取消，但唔想捨棄3,000個歌迷，所以繼續演唱會，好彩佢身體同精神都愈嚟愈好！」問到可希望再開騷？他說：「希望一年左右啦，如果紅館就更加好，今日開到已經係奇迹。」
更多新聞，請瀏覽東方日報網頁：
http://orientaldaily.on.cc/
|
鍾意就快D Share啦！
|
|
|
