楊愛瑾（Miki）前年嫁永安太子爺郭永淳，佢哋嘅囝囝Luken已經歲半大，Miki日前再喺社交網宣佈陀第二胎。冇化妝嘅大肚Miki，早前單拖去中環一間超市，見到佢面色有啲蒼白，入到超市就揀蔬果、肉類同麵包，買完就打電話通知司機嚟接佢，Miki上車之後就即食麵包醫肚。
早知有咗
Miki老友鄧麗欣（Stephy）前晚同張繼聰、陳靜（DaDa）、邵音音、林敏驄、蘇麗珊同導演泰迪羅賓到銅鑼灣出席電影《八步半喜怒哀樂》首映，Stephy話早排約過Miki食飯，一早就知對方有咗：「Miki好幸福，等佢有第三個嘅時候我陪佢。」
講到戲中有背部半裸演出，Stephy話：「冇考慮太多，因為相信導演，現場環境恐怖加埋我露背一樣恐怖。」Stephy認為暫時係自己嘅性感底線，相信亦係男友邱勝翊（王子）可接受嘅底線：「之前冇問過佢，因為臨時先決定拍，佢有睇過劇照，冇特別講嘢，我覺得拍得幾靚，佢都唔會反對。我哋唔會刻意問對方，會互相尊重。」會唔會限制男友拍親熱戲？Stephy話：「唔會，我都唔想自己有限制，如果佢拍親熱戲，我可能選擇唔睇。」
出賣姊妹
之前俾吳雨霏取笑同王子出雙入對，又催促結婚生仔，Stephy話：「好姊妹係用嚟出賣朋友，佢成日催呢樣催嗰樣最叻，唔會太快，拍吓拖先。」
撰文：馮仁昭
|
鍾意就快D Share啦！
|
|
|
