（互聯網）
歐聯分組賽巴塞隆拿主場對國際米蘭，今仗係B組榜首大戰，主隊雖然有王牌美斯受傷缺陣，但地上最強依然憑拉芬拿艾簡達拿同佐迪艾巴嘅入波，輕取藍黑兵團2:0。今仗優勝劣敗，過程唔算精彩，估唔到全場最好睇嘅發生於完場前。當時巴塞前鋒蘇亞雷斯主射罰球，佢吼準人牆會跳起射個地波，以為個波會應聲入網啦，原來國米波索域早有準備，人牆跳起時佢即時鏟落個空檔補位，成功擋走阿蘇射門，簡直係今輪歐聯最佳撲救！
無論係美斯抑或菲臘比古天奴都係罰球能手，佢哋最鍾意趁人牆跳起時射地波，不時有入球斬獲。國米方面早就知對手有呢一着，所以特登安排波索域企喺人牆榜邊，對手射門時就合力防守，務求做到滴水不漏。呢個辦法勁有效，睇嚟國米呢招會引領潮流，未來必有其他球隊效法。另外，美斯雖然冇辦法落場，但今仗仍紮住隻手、帶住囝囝入場撐球隊，唔知佢睇到波索域咁樣破「地波罰球」，會唔會睇到O晒嘴呢？
東網體育FB同你追實體壇每個精彩時刻！
http://bit.ly/2ecTF2A
來源 source: http://hk.on.cc
|
鍾意就快D Share啦！
|
|
|
