41歲視帝陳展鵬前日迎娶28歲嘅16年落選港姐單文柔，佢哋出晒海開船P（新聞連結： https://bit.ly/2yE9RD4 ），又喺中環一間酒店設宴，不過由於當晚只係擺咗19圍，前晚婚禮，撞正金牌監製潘嘉德擺大壽，有啲賓客兩邊走，好似陳煒咁，去完鵬單婚禮，轉過頭就祝壽，所以一對新人早已話過會另外擇日再招呼朋友（新聞連結： https://bit.ly/2yBCYXC ）。
只係事隔兩日「鵬單」就「找數」，佢哋今晚假中環一間餐廳舉行派對，喺晚上8時50分，陳展鵬拖住着低胸禮服嘅單文柔現身，榮升陳太嘅單文柔件衫玩deep V，露出事業線。
兩人由落車後一直拖住手再過馬路，單文柔受訪時話只係話做咗一兩日陳太，未知住習唔習慣呢個稱呼，但陳展鵬就好大反應：「吓，一兩日？」原來係陳展鵬快活不知時日過，記錯咗日子以為係噚日結婚。
單文柔話多咗一個身份，就要學做人妻，尤其係要照顧丈夫，佢話：「要諗下，學下再落力點照顧佢。」陳展鵬話大家都係尊重先叫佢哋陳生陳太，婚後兩人都係以英文名叫對方，佢又話試過老婆廚藝：「都OK，之前喺節目都試過，私下煮好多嘢我食，最多都係煲湯。」
今晚就係台慶亮燈，咁今晚有咩人呢？單文柔唔知，而陳展鵬就話交晒俾人處理：「我哋有個名單，交晒俾啲management。今晚亮燈，同事又拍劇，今晚搞呢個party最好最casual，決定係明智，以前啲人話結婚，都好難答到人（會唔會出席），所以都明白。」
問到今晚係咪不醉無歸？陳展鵬話：「我唔係好飲得，都會試下嘅，好耐都冇醉過。同埋聽日佢（單文柔）要開工，都係點到即止。」佢又解釋前晚主要係請雙方家人：「家人想低調，今晚可以癲下，唔使咁拘束，唔使話擺低人情坐一陣就走。」佢又話胡杏兒俾友情價，所以揀咗胡杏兒老公間餐廳開party。
精選娛聞，喺晒《娛果》
http://fb.com/appledailyent
| 攝影：沈健程 | |
|
鍾意就快D Share啦！
|
|
|