周潤發、郭富城、廖啟智、孫佳君、周家怡、張松枝及張建聲等主演，莊文強執導的電影《無雙》，前晚在九龍灣舉行首映禮，黃子華、謝賢、鄭中基及農夫等到場支持。大會司儀區永權盛讚現年63歲的發哥於戲中似36歲，發哥笑說：「年齡同身體健康倒行，拍呢部戲之前係唔做運動，得到郭富城啟發做運動，拍戲嘅時候發覺身手好咗好多，肌肉冇咁易攰，好多場戲都應付到。」發哥自言每日原地踏步15分鐘，接着又叫區永權和城城做訪問時原地踏步，被迫踏步10分鐘的區永權搞到一頭汗。此時，發哥忽然問城城：「知唔知養個女幾貴？」城城笑謂：「我養自己仲貴。」
| | |
考慮家庭車
發哥和城城一起接受傳媒訪問時，發哥即面對鏡頭恭喜城城：「恭喜晒你，係你個女（Chantelle）為你帶來好運，好旺你，發到巴巴聲。」城城被問到太太方媛是否已睇過《無雙》？他說：「佢話發哥好靚仔，佢喺上海睇普通話版。」發哥突然問方媛能否聽懂廣東話？城城表示太太懂廣東話，發哥再問：「咁囡囡呢？」 城城開始煞有介事說：「唔好講住。」發哥似想整蠱城城，繼續說：「講你個女之嘛！怕乜箒，你個女靚過你，我鍾意你個女多過郭富城，佢出世之後旺你買多幾架法拉利。」城城既無奈又尷尬回應：「唔係，我𠵱家唔諗兩座位，係要諗家庭車。」
每日趕收工
城城迅速轉換話題，大讚發哥是影帝之中的影帝，又自稱作為後輩，從發哥身上學習到大量的知識。發哥回敬指應歸功城城：「佢係講古仔好叻嘅演員，最難忘係爆炸後攬住城城死過翻生，今次未演過嘅角色冇包袱，因為budget大，每日趕住準時收工，所以不容有失，一定要順利。」
採訪：張俊銘
攝影：葉君海
|
鍾意就快D Share啦！
|
|
|