網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2018年10月4日 星期四

娛刺撈飯:嫻妃無聲攻略零死穴 佘詩曼孖Q護體贏凸 __,佘詩曼,

阿佘零死穴!蛇咬都唔信佘詩曼冇弱點,Nuts哥嘗試喺佢身上抽絲剝繭,睇吓呢位《延禧攻略》嘅「嫻妃」係咪真係無堅不摧,諗到頭都大埋!原來佢有「孖Q」(I ...


阿佘零死穴!


蛇咬都唔信佘詩曼冇弱點,Nuts哥嘗試喺佢身上抽絲剝繭,睇吓呢位《延禧攻略》嘅「嫻妃」係咪真係無堅不摧,諗到頭都大埋!原來佢有「孖Q」(IQ同EQ)護身,點同佢玩?

阿佘不嬲緋聞多多,不如試吓喺感情方面搵佢破綻!當年佢同陳浩民拍拖係公開秘密,高EQ嘅佢以不變應萬變,學古天樂一樣拒絕回應,就算男方之後傳偷食,阿佘都冇講過對方半句壞話,知道多言多敗必自斃,今日留一線,日後好相見!另一例證係當年鄭嘉穎同周麗淇(現名周勵淇)被公認為圈中金童玉女,但有傳阿佘亂入「穎淇戀」,周汶錡為咗撐個妹而公開數落阿佘,佢都忍氣吞聲。事隔幾年「佘穎」分手,兩女冤家路窄,佢依然落落大方,EQ之高,絕對係娛圈女將第一人!事過境遷,如今浩民同嘉穎已為人夫,阿佘同佢哋再見亦是朋友,仲不時為「前度」講好說話,有EQ又有氣度,贏晒!

賺人仔唔係靠把口

大家咪搞錯一樣嘢,EQ高嘅人唔一定IQ高,一個情商高嘅人可能因為不諳世事,所以好難牽動情緒,反之IQ高嘅人因為狂妄自大,容易做出反智行為,感性蓋過理性。阿佘的確勁,中齊孖Q,能人所不能,佢有今時今日嘅江湖地位,都係拜IQ高所賜。

是不幸,亦都係事實,公仔箱粒粒明星都話搵人仔,但都得個講字,等運到吸空氣多過吸金!你有冇聽過阿佘打鑼打鼓話「我要搵人仔」?佢就唔聲唔聲做畀你睇。無綫未播《延禧攻略》前,你又點知佢接呢套劇?佢審時度勢,早就估到呢套神劇係蔗渣價錢燒鵝味道。最堅係有傳佢哋劇酬得200萬人仔,套劇有70集,除番即係每集28,600蚊有找,大家都知內地嚴格執行限酬令,佢如果收呢個價,絕對喺框架之內,仲帶挈埋瓔珞、富察皇后、乾隆、傅恒等齊齊過限酬令,救晒成村人平安大吉,吹咩?最巴閉係套劇爆到開巷,唔使半年佢就狂吸6,000萬,乜都翻凸

終極夢想有得諗

賺完人仔愛回家,阿佘喺香港堪稱買樓專家,幾年來不斷睇準機會狂買磚頭投資保值,估計已坐擁過億物業,淨係收租都每月近20萬。有IQ 又有膽色,識搵錢仲要識使錢,更重要係識使喺邊度,百行以孝為先!有日Nuts哥撞到佘媽,見佢揸住架80萬Benz勁開心,佢當時仲大讚個女又乖又叻添!

學《賭俠》侯賽因話齋:「想偷我雞?」你要搵阿佘弱點,佢就用「孖Q」逐一擊破,見招拆招,睇準入市,佢有錢有陣又有勢,冇老公冇男友又如何?一樣活得自在!佢講過終極夢想係開幼稚園,一直都以為佢講笑,諗諗吓其實應該係真,你知啦,幼稚園債劵真係好「Q」貴。


來源 source: http://hk.on.cc
鍾意就快D Share啦!