「生煎包王」蕭潤邦（Oscar）和「花膠麵后」江若琳（Elanne）將於12月23日結婚，會在星級酒店筵開40圍大宴親朋。昨日進行過大禮儀式，在Oscar的大妗姐麗姐帶領兄弟團下，抬了八擔中式禮餅、乳豬、兩對龍鳳鈪、金戒、金豬牌、椰子、生果、海味及禮金到女家。他在儀式進行期間不能與Elanne見面，故在江家門口「罰企」，而準新娘則躲在房內，被迫分開半個鐘。
密密睇樓想置業
儀式完成後，兩人接受訪問時表示過大禮程序複雜得令他們頭暈，每日「濕碎嘢」令Elanne精神緊張，她說：「會突然彈起，問佢買咗呢樣嗰樣未，Oscar攰爆，佢話我終於有一個新娘嘅狀態。」而Oscar多得麗姐幫忙，不識傳統禮節的他如「小學雞」般每事問，到正式過大禮，全靠一班兄弟及麗姐，他則做司機接送。
問到禮金多少？Oscar避談：「心意最重要。」不過自爆給了未來岳父岳母兩次禮金，因求婚成功後他即時「落訂」：「好驚世伯、伯母唔畀個女嫁我嘛，到準備過大禮先知，原來禮金係應該今日先畀，世伯、伯母話唔使再畀，但我堅持，希望佢哋見到我嘅誠意，相信我一世都會對老婆同佢哋好。」雖然拒絕透露金額，但聘禮多到一張大枱都「擺唔晒」，連兩次禮金，相信超過100萬元。
Elanne撒嬌表示過大禮後會「失寵」，因父母吩咐她「唔好再蝦邦邦」。Oscar則爆女家回禮到男家時，其母聽大妗姐一句「百子千孫」後立即閃人：「原來佢衝入房喊。」據知，他正密密睇樓，希望盡快置業令愛妻有安樂窩，以行動證明愛錫Elanne並非得把口。
見面犯禁？
蕭潤邦過大禮後即與江若琳見面，坊間有指此舉犯下禁忌。堪輿學家陳子才表示，傳統禮節上的確要求準新郎及準新娘完成過大禮後，翌日才能見面，但時至今日，大部分限制都已放寬，現在完成儀式後即日便可以相見。並指過大禮前雙方不能見面，原因是避免相沖，否則容易令婚事有所阻滯。提到蕭潤邦付了兩次禮金，他指沒有問題，反而可視作「好事成雙」的好意頭。
至於江若琳表示：「我呢個大妗姐好潮嘅，佢話只要過大禮期間見唔到面就得。」而Oscar肉麻說：「因為我太掛住佢嘛。」
此外，將於11月22日與歐陽巧瑩（Tammy）結婚的林師傑亦於昨日過大禮，他做司機接載兄弟楊潮凱和周志康，攜四大袋包括金椰子、海味、「包羅萬有」大利是及禮金到女家，過程快靚正，女方父母很滿意。Tammy接受訪問時說：「我哋好趕，因為潮凱約咗人行山，阿康又要湊女，大家擺低咗，冇乜蝦碌嘢，好暢順，我媽咪回埋禮、攞埋金器，佢哋真係趕到飲咗一啖茶就走。」又指婚禮籌備了9個月，看見未來老公前一晚入禮金時很感觸：「時間真係過得好快。」林師傑的兄弟團包括羅天宇、楊潮凱、周志康、麥秋成、翟威廉、譚俊彥等，而劉佩玥、蔚雨芯、陳婉衡、王子涵、朱晨麗及反串的溫家偉等任姊妹團。林師傑表示：「哈哈，好似真係融入咗一個屋企咁，Auntie回咗少少禮畀我哋，成件事好幸福。」而林師傑與Oscar一樣未有按照傳統，過大禮後與Tammy見面，昨晚一齊出席友人婚宴，果然百無禁忌。
更多新聞，請瀏覽東方日報網頁：
http://orientaldaily.on.cc/
|
鍾意就快D Share啦！
|
|
|