曾問鼎三屆金像、一屆金馬影后嘅惠英紅，日前獲行政長官林鄭月娥頒授銅紫荊星章，其後又獲英皇老闆楊受成為佢設宴慶祝，期間更送上銅紫荊星章造型嘅蛋糕添。
席間，英紅姐話屋企有兩個金馬獎、四個金像獎，而銅紫荊星章就會擺喺正中間，因為「呢個獎好似係一個冠冕，覺得被認同。同埋屋企人曾經話『你而家做返官，我哋有人做番官喇！』感覺上好似為屋企增咗一啲光，嗰種感覺好溫暖，同攞到電影獎項係唔同嘅」。
問返英紅姐，特首林鄭喺合照時推開老公一事，佢就話：「好好笑，其實當時我喺現場睇到都幾羨慕，結咗婚咁多年，兩夫妻仲可以有啲咁俏皮嘅動作。佢老公又好可愛，會話『好啦唔阻你』。佢哋嗰種默契同恩愛係發自內心先會有呢啲小動作，我又唔覺得有咩小男人、大女人，我完全唔覺得，我覺得係一對好恩愛嘅夫妻先會咁樣。」
開到口講羨慕，難怪英紅姐話下個目標就係嫁得出啦，仲話對象就算有大肚腩、臭狐都無所謂，係個好人就OK。
來源 source: http://nextplus.nextmedia.com
|
鍾意就快D Share啦！
|
|
|