英皇歌手洪卓立同湯怡拍拖11年，雖然佢哋一直被視為模範戀人，點知佢哋前晚齊齊喺Ig宣佈「分」訊，結束呢段11年情。湯怡噚日傍晚時分去咗堅尼地城拍戲，佢戴住cap帽神情落寞咁落車。
近半年現危機
問湯怡拍咗11年拖，最終都要分手，有冇覺得可惜？佢助手即時話趕開工唔好意思，湯怡亦都話：「唔好意思，今日唔做訪問，多謝關心。」而立立就喺私人fb貼咗一張相片，相中寫住：「沉默是儍瓜的最好答案」。舊愛湯怡都有畀like，明顯兩人都唔想回應分手事件，聽日立立會出席公司旗下品牌珠寶義賣活動，到時唔知會唔會回應傳聞呢！
分手消息前晚傳出後，唔少網民都覺得好震驚，仲有網民懷疑湯怡移情戀上陳家樂。據知呢段情喺近半年已經出現危機。同時又有傳聞話湯怡早前拍戲，曾經俾一位幕後熱烈追求，嗰陣湯怡未有接受，但係都成為佢同洪卓林之間漣漪，兩人關係更沖淡，最終協商下決定分手。
噚日傍晚英皇高層霍汶希回應時話：「家樂、湯怡同洪卓立同一team、同一經理人，好似當年Boyz同Twins一樣，廣告活動會一齊配搭，好離奇畀網民誤會咗，家樂呢排係有機會同湯怡做一啲廣告，完全公司安排，網民就以為佢哋好多情侶檔，其實家樂呢幾個月係冇得瞓。家樂根本冇諗過呢段時間去拍拖，佢亦冇時間去拍拖。」
撰文：馮仁昭
|
鍾意就快D Share啦！
|
|
|