年僅19歲就入行的吳浣儀，拍首部劇集《朱門怨》就成功上位，但因任性而離開無綫，更早早嫁人。原以為平凡做個幸福少奶，但丈夫患癌散盡家財，她只好母兼父職拍劇養家，捱足多年，三女一子均於香港大學畢業，現在從事社工、飛機師及獸醫等。浣儀姐日前接受《蘋果》專訪，自評是嚴母：「好臭脾氣，𠵱家收晒火。」
採訪：嵐山
攝影：陳俊強
現年64歲的吳浣儀，73年參加無綫藝員訓練班，翌年就被選中飾演《朱門怨》的三少奶，本來星途一帆風順，但她卻兩度離開無綫。浣儀姐日前接受《蘋果》專訪，直認以前很任性：「拍完《朱門怨》叫做紅咗，但無端端又搵番你做reception、伙記，條氣唔順，又拍緊拖，之後去咗佳視做到佢執笠。咁當時男友就話不如結婚啦，咪結囉。」
| | |
鮑起靜雪中送炭
浣儀姐24歲結婚，除了要照顧三女一子，更與丈夫一起打理旅行社，直至87年才重返無綫拍《季節》，之後又因亞視高薪挖角再離巢。好景不常，丈夫患肺癌，數年間家財幾近散盡，05年丈夫病逝，其間浣儀姐要問朋友借錢度日，幸好有鮑起靜義助，還有羅蘭借出20萬元解困：「因為醫病使好多錢，當年真係連樓都抵押埋，最細個仔嗰陣得12歲，女又未出身。」
苦過方知甜，浣儀姐四名子女均於香港大學畢業，浣儀姐自豪地說：「大女做社工，二女揸飛機，7月剛升做機長喇。三女讀獸醫，四仔就喺電訊公司做，職位都幾OK啦。」以往浣儀姐不論拍劇有多忙，都會督促子女讀書。「冇人鍾意讀書，所以真係要由細逼。成個小學我睇㗎，我拍嘢都會遙控，默書就用錄音機錄晒，叫佢哋撳出嚟聽住默，同佢哋講『我拍完幾夜都會返嚟睇。』」她自評是嚴母：「我係幾惡嘅人，好臭脾氣，現在收晒火。」那麼她算得上是稱職媽媽嗎？浣儀姐笑說﹕「一定係！稱職老婆就唔敢講，因為我唔識煮嘢食，老公叻我好多。」
尊重子女的嚴母
雖然是嚴母，但浣儀姐尊重子女，會避免接送他們上學：「佢哋細個讀書，唔鍾意我去接返學放學，因為媽咪演戲，同學會問長問短，仔女俾同學講多兩句就唔鍾意。」近年二女為她添了一名男孫，浣儀姐提起孫仔就開心：「幾醒目，工人話有佢婆婆嘅演戲細胞，好多表情，見人唱歌又學你唱。」三代同堂，浣儀姐可以安享晚年，在她口中是「做又得，唔做又得」，浣儀姐知足地說：「夠使咪得囉，每人畀啲，發仔（周潤發）話齋，撻住15蚊人字拖都幾舒服呀。」
浣儀姐現在已不需要再為口奔馳，可以享受人生，拍過多部電視劇的她卻坦言已很少看電視劇：「Sorry，睇唔落。有次唔好講邊套啦，因為自己老友喺度做，我捧吓場，但睇咗一場就熄咗機。」浣儀姐覺得以前無綫上下拍劇用心，可惜此情此境已不再：「最重要搞好件事，觀眾出嚟鍾意。以前啲劇個底好，執少少就得，但𠵱家成個劇本都冇得搞，咪算囉，照做囉。」
場地提供：Teppanyaki Kaika（The ONE）
|
鍾意就快D Share啦！
|
|
|