無綫有好多老戲骨，大家未必嗌得出佢哋個名，但絕對認得出佢哋個樣，就好似已經71歲嘅陳嘉儀（嘉儀姐）咁樣。
雖然嘉儀姐2009年已經離開無綫再無幕前演出，但外表幾乎無變，一眼就認得出，71歲嚟講真係keep得好好！而且出街買個餸都姿柔淡定，果然係演慣夫人、闊太。不過嘉儀姐雍容華貴嘅闊太形象，係公仔箱俾觀眾嘅感覺，其實同佢傾過偈，就會發現佢都幾爆幾有可愛架。
以2000年佢重投電視圈拍《十月初五的月光》為例，當時嘉儀姐已經有17年無拍劇，難得復出緊係要問下無綫係咪重金禮聘打動佢啦，點知佢一啲都唔怕方丈份人好小氣咁話：「復出拍劇酬勞唔理想，剩係夠我用嚟買化妝品同坐車。亞視都有邀請我拍劇，酬勞仲多過無綫一倍，不過我應承無綫在先。」
另外，據知嘉儀姐2009年62歲離開無綫，唔係退休，而係為照顧患病老公，所以甘願放棄喜歡嘅演員生涯。有傳媒問佢點解離開、會否得閒復出過戲癮，佢嘅回答保持一貫爆趣，同時又充滿住感人嘅愛：「我老公經常出入醫院，仲拍乜鬼劇啫，梗係家庭緊要啲講真，我哋一把年紀，無幾多年喺人世，有時間都陪下老公啦，以前老公冇事就話拍吓啫。」
《壹》仔見到嘉儀姐當日，佢買咗一陣餸就要搵位坐低食粒藥，再抖返一段時間先起身離開。所以除咗照顧老公，嘉儀姐你都要保重身體，唔好太操勞呀！
來源 source: http://nextplus.nextmedia.com
|
鍾意就快D Share啦！
|
|
|