林秀怡喺《是咁的，法官閣下》得到關注，唔少觀眾更認為佢無論演技定係人氣，都喺王君馨、麥明詩等女演員之上。能力獲得肯定，林秀怡算唔算係苦盡甘來？佢又曾經點苦法？
喺大台一個月得$7000，仲要養埋阿媽，林秀怡真係衫都唔敢買多件，所以圈中好友蔚雨芯會將啲著過一兩次、未剪牌嘅衫俾咗佢；依家呢個年代，人靠衣裝未夠，仲要靠埋化妝，好彩趙希洛亦夠老友，會俾啲化妝品佢用。
除咗節流，開源同樣重要。林秀怡除咗曾經喺食肆打工做侍應，早年亦趁某啲日本品牌condom尚未打入香港市場，由日本拎貨返港喺網上售賣。不過無耐後該品牌喺香港流通，搞到林秀怡有一大堆貨積聚賣唔出。呢個時候又有貴人幫手，Toby梁靖琪幫佢買晒再分俾朋友。
生活艱難，唯有搵命搏，《怒火街頭2》就係一個機會。當時監製要搵個女演員，喺冬天十幾度之下扮裸女半天吊，搵過幾個演員都唔肯，係得林秀怡一口應承，監製好欣賞咁話：「下次再開劇一定預埋佢。」林秀怡出名搏命又抵得諗，今年終於等到戲份吃重嘅角色，仲要係三大台慶劇之一。演藝事業有突破，又拎咗筆積蓄同朋友喺旺角女人街開日式意粉店，正式做老闆。
來源 source: http://nextplus.nextmedia.com
|
鍾意就快D Share啦！
|
|
|