04年，張衞健和張茜在南京秘密領證。
08年，張茜懷孕8個月流產！
「當年都唔知自己受創傷，只係知道如何去照顧太太，到太太走出陰霾，原來我仲喺裏面！」太太小產10年後，健仔接受《蘋果》專訪說。
當年健仔在無綫拍劇其間，曾先後跟江欣燕和宣萱拍拖，之後轉戰大陸市場，認識了跟他命中注定的張茜：「我好少主動追女仔，我老婆就係拍戲識，當時我人生路不熟，『帶我去玩下啦』、『畀個電話嚟得唔得』、『做我導遊呀』記得夜晚食完飯，佢帶我去天安門，經過午門，拖出去斬頭嘅地方，我：『哎呀！好驚呀！』隊個頭埋去佢膊頭度，哈哈哈，咁咪拍拖囉。」
一段中港婚姻，有心就可以維繫，健仔說：「其實我哋婚姻有少少異於常人，唔係一日到黑黐埋朝夕相對，佢有佢嘅事業喺北京，我有我嘅屋企人老友記喺香港，咁……好容易出事喎。」鬼馬的健仔口說易「出事」，問有否試過出軌？他眼睩睩說：「即係『偷跳（潮語）』，使乜偷唧，有心的話，太容易啦，夜晚10點幾通電話：『老公，我瞓啦，聽日返工。』我：『好呀！我唔出街，放心！』收線之後，我就可以換衫出街，夜晚10點幾到第二朝，乜嘢都可以搞掂啦，但我真係冇，而佢真係信喎！」
健仔得戚說：「點解佢會信我呢？信我唔會電燈着鬼掹腳呢？因為我紀錄好，紙包唔住火，呃十次，遲早一次有蛛絲馬跡露餡，我真係冇呃，當我唔係同佢一齊，一係喺屋企開部戲睇，一係揸架車周圍兜，一係同許志安、蘇志威打枱波，一係同屋企人食飯，一係去買衫，一係去游水曬太陽，我長年累月都係咁生活，所以佢真係信我。講真，掉番轉佢10點打畀我：『老公，我瞓覺啦，你乖乖哋，唔好整古做怪。』佢都可以呃我，但梗係唔會啦，我哋唔會check電話，佢唔會懷疑我，我唔會懷疑佢，我哋不停做到小別勝新婚，見到好開心好珍惜，見唔到時候會信任對方。」
兩夫婦能夠互相信任依賴，是否當年的小產傷痛令感情更堅固？健仔坦言：「唔關事！咁多年以嚟，我拍親戲起碼有兩個女主角，問我有冇誘惑？一定有，但我處理OK，同埋我都唔過電，我永遠着『波鞋』，我有分寸，絕對唔會同女主角去食飯、喺酒店房傾劇本，我唔會畀自己有呢啲機會出現。你話因為上次失胎事件，有冇令夫妻關係增進？就算有都可能少少。」
當年如何走出小產傷痛？他直言：「當時我冇走出呢個傷痛，我整個人所有心神、細胞，完全投入喺佢身上，希望佢以最短時間身心得到100%恢復，做啲乜嘢可以令佢忘記呢？同佢玩乜嘢遊戲可以開心一個鐘？半個鐘？15分鐘都好吖！快啲帶隻狗返嚟先，佢見到隻狗就開心；買啲時裝雜誌先，佢咁鍾意睇……等等等等。我盡所有力量幫助佢，然後好快太太走出陰霾，直至今年，我參與天主教會關於失胎父母心靈治療講座，當中我學識一樣嘢，大部份朋友都將所有注意力擺喺女人度，當然係女人最痛苦，佢懷嘅BB冇咗，但大部份嘅人都忽略咗男人，其實爸爸都好hurt，受咗好多創傷，甚至乎自己都唔知，正正好似我咁！」
健仔指當年不知自己受創傷，只知道如何去照顧太太：「到太太走出陰霾，原來我仲喺裏面，參加完呢個講座，我先意識到，老婆好番之後，自己都唔係咁好，唔係好開心，閉閉翳翳，如果有讀者失胎，除咗照顧女士，大家都要注意男士嘅創傷。」
撰文：余燕儀
攝影：陳慧安、廖達燊
場地：W Hotel
Google Play 2018 年度最受歡迎應用程式，請即點擊
http://bit.ly/2FCthz5 投《蘋果動新聞》一票
精選娛聞，喺晒《娛果》
http://fb.com/appledailyent
| 健仔和老婆結婚多年互相信任（攝影：陳慧安） | | |
| |
|
鍾意就快D Share啦！
|
|
|