:事隔三年，終於返大台拍跳躍生命線嘅馬德鐘，不負眾望，將「在哥」演到男神一樣。近年中港兩邊走，賺咗唔少北水嘅佢，一早為家人安頓好一個二千呎獨立屋嘅安樂窩。
馬神個竇，原來同張敬軒間屋有得揮，都係圈中數一數二出名嘅有taste屋，據知佢花咗五百萬及大半年時間裝修，加上佢嘅擺設，唔知以為入咗藝術館。
你會發現，馬神安樂窩有三多，就係木多，花多同古董擺設多，每一個角落，都放有馬太嘅花藝，打理呢間品味屋，真係少啲心機都唔得。
有名叫馬神，近年又做咗馬主嘅佢，屋企點會冇馬像。放於客廳當眼處，就有一個好咁有氣勢嘅銅像，就係近年內地著名雕塑家任哲嘅作品，價值六位數字。呢位雕塑家經常以古代武士嘅英偉形象為載體，馬神睇中呢個，唔使多講，兩個字:襯晒！
屋外花園，佢一樣花心思，放咗兩組西班牙Vondom發光戶外傢私，夜晚可以同班friend喺度摸住酒杯底，唔使出去劈。而門口位，亦放咗好大座酒杯櫃做裝飾。
一啲都唔似步入五張嘅馬神，近年好享受家庭生活，一有時間就同老婆遊周列國年初佢決定結束兩間食肆，除因香港營商環境差，另一原因佢話唔想再為賺錢而失去生活，所以學識放手，好好享受人生下半場。
立即下載Apps，隨時隨地睇盡時政專題、深度偵查、娛樂熱話！按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|