出爐視后李佳芯話，得獎最重要係可以提高身價，賺多啲錢。唔好以為佢咁市儈，其實佢爸爸媽媽都退休，佢想盡快買屋俾兩老安享晚年，搬離柴灣公屋老家。
其實李佳芯唔係事事以錢行先，不過佢要養家，冇錢就慢慢不能，所以入大台之後， 15年佢喺朋友間髮型屋幫手執頭執尾，希望賺多啲錢，佢自己亦有少少股份。
前年佢仍然住公屋搭巴士，生活非常貼地。後來朋友移民，佢亦冇繼續做髮型屋，寧願專心拍好每套劇，基本上係逢工作必接。而單係呢年幾，佢拍咗四套劇，加埋商業活動、登台、廣告等等，賺咗大約八百萬。
不過代價係身心俱疲，尤其佢做完婦科手術之後，拍《BB來了》。佢其實係執岑麗香二攤拍呢套劇，由於趕住開拍，好難再搵其他人頂上。
佢唯有硬住頭皮去演，但就試過辛苦到喺屋企喊，唔想返工，仲話個角色又發癲，真係命都俾埋你。不過每次入廠仍然搏晒命去演，個角色本身好歇斯底里，佢自己當時亦情緒波動，可能因為咁而演得咁出色。
近期拍完新劇《殺手》，佢皮膚問題嚴重，生咗好多粒粒，加上中醫話佢個腎唔好，長期情緒波動亦影響免疫系統，所以佢完成手上工作，會入院做詳盡身體檢查。所以暫定未來半年唔拍劇，只會接簡單嘅綜藝節目同賺外快，慢慢養好身體。
呢段時間佢咁搏殺，真係忽略咗男朋友陳炳銓，感謝佢一直咁體諒。雖然外界覺得佢同男朋友發展有差距，但佢話同男友相處上根本冇距離，大家亦向住結婚呢個方向發展。平日同男友行下山，佢已經覺得好開心寫意。
立即下載Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|