【新增內容】
噚日39歲嘅周勵淇突然自爆已經結咗婚，老公仲係大陸演員傅浤鳴（舊名：傅程鵬），本來結婚都可以算係一樁美事，之但係原來傅浤鳴曾經有過一段近廿年嘅婚姻，更育有一子，而離婚到再婚都只係一年多啲嘅事，結果惹嚟諸多揣測。
45歲嘅傅浤鳴同42歲嘅前妻程愫都係大陸演員，兩人更加係上海戲劇學院嘅同校師兄妹，雖然兩人就讀時互相都唔識對方，但一次傅浤鳴以優秀生身份返母校幫手招聘，遇上程愫，好快兩人就一齊去咗南京軍區前線文工團做同事，喺共同嘅追求、愛好、理想及生活當中，兩人喺周圍朋友幫忙撮合之下共諧連理，自此形影不離，更加係圈中嘅模範夫妻。
剛結婚嘅傅浤鳴同程愫喺演藝事業上雖然未有好大成就，但兩人自結婚起一直都低調恩愛，程愫非常支持老公追求事業，喺2010年兩人嘅囝囝出世後，程愫更加注重家庭，而傅浤鳴亦因為拍軍旅戲而開始打開知名度，喺一次訪問中，程愫形容傅浤鳴係一個「責任感強、有擔當、是一個萬裏挑一的丈夫。」
一次傅浤鳴同程愫嘅訪問中，傅浤鳴話自己曾經試過幾年冇戲拍，每月收入只有幾百蚊人民幣，當主持人問程愫點解結婚時，程愫話：「人家說我一定要有房，我再結婚，或者說我一定要買車，我再結婚，結婚要錢嗎？結就結吧。」呢句說話，當年得到好多影迷支持。
不過到咗上年，傅浤鳴被爆同程愫離婚，有自稱程愫「閏密」嘅網民喺微博爆料，話傅浤鳴為咗一個介入佢同程愫婚姻嘅第三者，不惜拋棄糟糠及兒子，呢條微博曾經被大陸網民瘋傳，但係最終已經被刪除。
可惜，背後種種原因外人不得而知，只係知道呢一對曾經嘅模範夫妻已經離婚，42歲嘅程愫帶住8歲嘅囝囝繼續生活，而昔日嘅程愫老公傅程鵬，o依家已經係周勵淇嘅老公傅浤鳴喇。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|