劉德華紅館跨年演唱會，今個星期六（15日）就舉行，正當華仔密鑼緊鼓為演出綵排，今日有台灣傳媒報道，指華仔旗下嘅「映藝劇團」，捲入欺詐傳聞。
與此同時，本報讀者今日在九龍灣發現有數名口罩男，拉住分別寫上「映藝公司 還我血汗錢」、「劉德華 映藝公司 無德無信」嘅banner同紙牌企喺馬路邊，唔知同報道嘅事件有冇關係。
讀者陳小姐透過「爆相爆片」分享咗幾張相片，並接受本報電話訪問，佢話：「今日大約4點鐘已經見到佢哋，有3個男人都係戴口罩，企喺宏光道嗰度，聽到佢哋講嘢係用普通話，但我八卦走埋去問佢哋發生乜事，佢哋就唔答我。」
陳小姐又話，佢因為工作要去附近開會，大約5點半開完會離開，都仲見到佢哋企喺度，但因為佢本人都要離開，所以唔知幾個口罩男最後企到幾點。問佢當時街上多唔多途人留意banner？陳小姐話：「其實佢哋喺條街四個角都掛咗banner，不過都冇乜人望，佢哋就只係企喺度，冇咩行動。」
根據台灣傳媒報道，一間名為「聚善美」嘅公司，指「映藝劇團」單方面終止其公司作為演唱會投資者資格，不但將其公司嘅商標喺海報中刪走，之前按協議支付嘅投資款項都被沒收，認為被欺詐，而映藝劇團一位李姓代表，更被該公司提出刑事控告，目前由台北地檢署偵辦中。
報道指出，一位代表「聚善美」嘅蘇姓負責人，先後取得華仔今年及明年喺中國同香港兩地演唱會嘅合作合約，更於今年5月同7月簽定「香港站」嘅投資協議書，又指7月26日公佈劉德華香港站演唱會海報，「聚善美」嘅商標都喺度，惟後來商標忽然被刪去，並於9月22日獲發函，指「聚善美」違反投資轉讓約定，所以終止雙方投資協議，並沒收投資款項。《蘋果》聯絡華仔公司了解，暫未有回覆。
精選娛聞，喺晒《娛果》
http://fb.com/appledailyent
| 劉德華演唱會舉行前再爆是非。 | | |
|
鍾意就快D Share啦！
|
|
|