大生銀行後人馬清揚與老婆錢慧儀結婚23年，二人一直恩愛，今年7月驚傳二人鬧婚變，當時已冷戰4個月，有傳錢慧儀有情緒病困擾，而馬清揚亦直認有此事，話太太已去咗美國養病，順便陪大仔生活，佢10月出席活動時提及太太狀況，當時馬清揚表示：「o依家休養緊，身體同心情都休養緊，OK嘅，o依家喺美國同個仔住，唔使喺香港環境太窄同太緊張，我有時間都會過去。」（新聞連結： https://bit.ly/2UEd5QY ）
近日《蘋果》收到讀者報料指婚變有另一版本，聲稱馬清揚兩年半前已有烏克蘭金髮索模新歡Ksenia B.，男方疑為索模喺中上環某精品公寓酒店提供「私竇」住，又供給奢華生活，包括遊船河、坐私人直升機，把臂同遊出埠睇賽車云云。
讀者更報料指二人今早坐國泰航班去峇里，《蘋果》根據資料到機場守候，大概10點半就見到Ksenia獨自現身，佢素顏戴太陽眼鏡挽着隨身行李，去咗頭等櫃位辦登機手續，未見有寄艙行李，之後就獨自入閘，但就未見馬清揚影蹤。
《蘋果》就上述傳聞搵過馬清揚，佢喺電話表示身處香港：「我仲喺灣仔塞緊車，約咗人食飯。」對於傳有烏克蘭女模新歡Ksenia，馬清揚多次強調冇啲咁嘅事，亦表示唔識一個叫Ksenia嘅女仔：「唔識，可能日日出街啲人傳。」講到同太太有婚姻問題，o依家就傳出有新歡，問到佢目前嘅婚姻狀態？佢就表示：「婚姻都係咁樣，o依家都係冷戰，冇乜進展。」再問到緋聞一出，會唔會令太太更加誤會？佢表示無辜：「點樣誤會？呢啲係傳，都唔關我事，你哋喺度亂咁傳，都唔關我事。」Ksenia喺Ig曾貼舊年10月去大馬睇一級方程式，一直係賽車迷嘅馬清揚就表示自己因工作忙，冇去過當地睇賽車。
馬清揚透露太太已同兒子返咗嚟香港過聖誕，問到佢哋冷戰關係有冇改善，佢話：「都係咁樣。」再問到太太情緒問題有冇改善，佢就表示：「都係咁樣，講咗咁多次，都係咁樣，冇乜進展。」記者就問到二人會唔會離婚？馬清揚表示：「都冇諗過咁多嘢，都係咁啦，唔驚咁多，暫時冇問題，都係冷戰，時間慢慢磨合，有對話空間，大家都咁多年，又冇事發生。」最後，馬清揚強調自己冇第三者、亦冇婚外情，最後問到有否喺派對場合見過Ksenia？馬清揚都表示全冇印象。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|