麥兆輝憑電影《無間道》成名，之後的《竊聽》系列奠定他跟莊文強黃金拍檔的關係。今年被喻為麥、莊的組合各自發展，先有莊文強的《無雙》早贏票房，而麥兆輝執導的《廉政風雲．煙幕》安排在農曆新年出擊，早前他為《廉》片宣傳接受訪問。
談到戲名由來，原來經歷一輪腦力遊戲，他說：「當個故仔寫好晒，係講走私煙仔，人物關係好複雜，好多煙幕令你唔知真相係乜嘢，當時諗咗個名叫《煙幕》，好鍾意呢個名，因為有雙重意思。但係遇到一個人嘅阻力，就係老闆楊生。我明白用《廉政風雲》易推廣做宣傳，最後我度咗條橋，話大題目係系列片，先有《煙幕》，之後會有《黑幕》同《內幕》咁拍落去。」麥兆輝笑言過了海做神仙，《廉政》系列日後是連續，還是獨立故事，已經是後話。
其實早在過老闆一關前，在選角時有另一重考驗，就是要找影后級的袁詠儀（靚靚）客串演反派角色，他自爆今次動用了「親情牌」：「我同靚靚有個秘密，同佢係『親戚』嚟，好細個十幾歲就識，佢叫我做『表哥』，我叫佢『表妹』，佢叫我媽咪做契媽，細個阿靚成日嚟我屋企玩。之後返嚟見到阿靚，點解佢咁靚嘅？之後佢去選港姐贏埋冠軍，做埋大明星，我繼續做副導演。」事實上，他們沒有血緣關係，但麥兆輝對這個「表妹」是有點怕，試過以副導演身份，在拍攝現場跟她有過一次接觸，他說：「佢好嘈，見我食煙，佢就話『哦，你食煙我話畀你阿媽聽，你講粗口話畀你阿媽聽』，成日都用話畀我阿媽聽嚟嚇我。」他自言今趟是本着不妨一試的心態找對方，因為戲中阿靚跟劉青雲，會由讀書時的情侶，最後變成工作上的對頭人：「打電話畀佢，問佢會唔會畀面自己客串，仲同佢講『你唔做唔緊要，但唔好鬧我，唔好話畀我阿媽聽』。」
麥兆輝講到戲中另一位拍檔，就是初次合作的張家輝，曾有幕後行家問起：「『呢套戲你搵張家輝呀，你見咗佢未呀？佢都幾麻煩喎』，我話真係？麻煩乜嘢先？嗰位幕後話『唔知呀，總之好麻煩啦』。」之後他相約家輝傾談，原先以為一個小時可以講完，最後足足傾了三個鐘，麥兆輝說：「佢真係幾麻煩，佢所有問題都係問你角色問題，好在我寫劇本，所以答到佢。通過傾偈，我亦都更了解個角色，佢係麻煩，不過係麻煩緊專業工作範圍嘅嘢。佢冇話要七個保鑣圍住、去酒店明明一個人要三間房，我聽過有呢啲情況。」他更斷言張家輝雖然贏過多個影帝獎座，但仍是被低估的演員。
青雲先後演過三集《竊聽》系列，被喻為麥、莊的「御用演員」，麥兆輝自言不敢高攀，他笑說：「係就好呀，件事分開嚟講，拍《無間道》時自己係個細導演，雖然之前拍嘅戲有啲口碑，但唔係好收得。演員、老細都會揀，未必會畀到budget你去請大明星，所以《無間道》要有劉偉強喺度，至搵到梁朝偉同劉德華。相對而家，我當然有能力去搵大演員，寫劇本時冇諗用邊個演員，但相對而家搵演員容易咗，本身寫劇本都成熟咗。」
《廉政風雲》故事講私煙、殺手滅口的故事，不難令人聯想到多年前廉署證人徐道仁，在新加坡被殺的新聞，麥兆輝說：「嗰件事只係影子，徐道仁事件都好轟動。當時證人俾人殺咗，三個殺手都喺香港判咗刑，上年服完刑放咗監。呢件事係我做research時冇辦法知道真相，但有好多dramatic元素，於是我擺咗呢個背景，但唔係完全係嗰件事。」
另外，麥兆輝跟莊文強暫時分開發展，對觀眾是件好事，至於去年底到今年農曆年，都會看到二人作品：「一齊去做產量好低，兩年先一部戲，莊文強已經可以獨立做到導演，十月睇到《無雙》新年又睇到《廉政》幾好。暫時發展係時候分開，自己都好多年冇獨立做導演，係時機畀觀眾睇返我單獨導演，費事又俾老婆鬧『點解唔拍多兩套戲」』。」
精選娛聞，喺晒《娛果》
http://fb.com/appledailyent
每晚送5萬！星期一至五晚上10點半
《動腦Q》Let's Q the money！
http://bit.ly/2QW8LcI
|
鍾意就快D Share啦！
|
|
|