現年53歲的羅霖與前夫劉坤銘離婚六年，母兼父職照顧三名兒子，她要肩負起兒子的學費和生活費，即使多艱難，她堅決要撐下去。羅霖日前接受《蘋果》專訪，她痛憶離婚時，曾令她情緒崩潰，更因此懷疑宗教，現在單身的她雖然有愛犬相伴，但隨着兒子逐漸長大，她坦言：「都希望有個伴。」
相關新聞：狗望高處 訓練愛犬變醫生
有「美魔女」之稱的羅霖，與前夫劉坤銘結婚16年，育有三子，2013年離婚後，羅霖決意展開新生活，她三年前坦承跟內地男J君相戀，他們雖去到求婚階段，最後竟分手收場。現在感情空白的羅霖，最近養了一隻狗女棉花糖，母女情誼，令她感覺寵物感情沒這樣「化學」。羅霖日前接受《蘋果》專訪，她有感而發說：「人會變，狗唔會變。愛情嗰啲好難講，唔係只係婚姻，以前拍拖都會，可能好愛，但係某啲原因，性格唔啱會分開、有第三者介入分開，感情嘅嘢我覺得冇永恒，但同狗就可以永恒，佢永遠都淨係得我一個。」
| | |
「佢哋要錢先搵我」
提到前夫劉坤銘再婚，可會令羅霖倍加感慨？她想了想說：「對我嚟講冇感慨，我咁嘅年紀，好多嘢已睇淡，係三個仔會唔開心，我𠵱家暫時冇諗呢樣嘢，等啲仔獨立咗，可以大學畢業做嘢，我先諗呢一方面，啲仔大咗唔知仲有冇人追呢，但都希望有個伴。」
羅霖表示34年前，當時19歲的她瞞着媽咪買了一隻魔天使回家：「媽咪鼻敏感唔畀我養，我買咗返屋企，同阿媽講：『人哋送畀我嘅生日禮物』，媽咪話：『千祈唔好畀我見到佢』，但一個禮拜後，隻狗同我媽咪瞓㖭，完全冇敏感，媽咪好錫佢。」第一隻愛犬更陪羅霖度過16年，包括她結婚和生子：「佢好乖，可以同佢傾心事，開心唔開心佢都知。有時我唔開心流眼淚，佢又舔我啲眼淚，好有性，到佢最尾嗰兩年，有糖尿病，都要去狗醫院吊鹽水。佢過身嗰陣，我同阿媽都喊咗成個月，阿媽後尾仲有少少抑鬱症，因為我阿媽同佢太親密，好似冇咗個伴咁。」
已有三子的羅霖，家中陽盛陰衰：「我三個仔投票，以前兩個哥哥成日話日後一定要生女，我當年冇得揀生仔定生女，所以狗我一定揀女仔，可以幫佢扮靚，完成咗我有女嘅心願。」愛犬更治癒羅霖心靈：「我心情低落嗰陣，佢幫助我好多，啲仔都開心咗。有時我壓力大瞓唔到，擺佢喺床邊，佢啲鼻鼾聲，我會覺得好搞笑。狗同人係有分別，小朋友要付出好多愛、包容同忍耐。但係狗，係佢付出多過我付出，例如我去街，佢會去門口等我，因為佢淨係得我一個，𠵱家啲仔好難會咁對我，佢哋要錢先搵我。人同狗一樣，在生之年要愛佢哋多啲，唔好等佢哋走咗先後悔。」
相關新聞：【蘋聞重溫】鄺美雲視愛犬如子
遊聖城克服挑戰
身為虔誠基督徒的羅霖，去年底曾到以色列「聖城」耶路撒冷朝聖，她還嘗試揹着十字架行聖城，再在約旦河受浸，她反思良多：「因為我六年前經歷過離婚，我曾經懷疑過宗教，亦都有祈禱問神，點解咁多難題，可唔可以唔畀我，已經承受唔到、會崩潰。」以色列之行令羅霖體驗良多：「尤其係揹住十字架，行返耶穌釘十字架行過嗰段路，十字架重20、30磅，高過人，揹到膊頸瘀晒，揹咗大概三分之二嘅路，當時我喺心入面禱告就話：『我明白我哋呢啲苦難，同你相差太遠。』所以我有工作就更加努力去做，會克服每一日。 」
採訪：唐如
攝影：葉君海
髮型：Jay Cheung
化妝：Peggy Tsui makeup & styling
場地提供：香港寵物專業學院
|
鍾意就快D Share啦！
|
|
|