無綫花旦陳凱琳與鄭嘉穎的兒子鄭承悅（Rafael）最近出世，正在坐月的陳凱琳急不及待「出關」在銅鑼灣出席餅店開張活動。剛生完BB的陳凱琳除了身材沒有走樣，四肢依然纖瘦外，正在餵人奶的她上圍更升上到D Cup。陳凱琳指今次做媽媽是人生數一數二的開心時刻，問到可習慣做媽媽？她笑說：「感覺好開心，每朝見到BB，十月懷胎都覺得係值得。」
老公負責剪臍帶
陳凱琳透露兒子在情人節開刀出世，沒有特別擇日，生產也在預產期時間內，她說：「嘉穎有陪我入產房見證呢一刻，佢負責剪臍帶，見佢唔驚，仲好興奮。自己反而有少少緊張，因為第一次生BB。」陳凱琳指兒子由外公改中文名叫鄭承悅，希望他一世開心喜悅，而英文Rafael除了與網球手拿度相同，還有受主耶穌的守護的意思。
問到上圍升cup時？陳凱琳尷尬說：「我冇計過，依家餵緊人奶，冇諗咁多，最緊要係BB可以吸收到充足嘅營養。（要換晒啲內衣？）呢啲自己處理啦。（生完之後肥咗幾？）佗BB時肥咗20磅，依家冇上磅，唔會緊張磅數。（嘉穎有咩獎勵？）佢成日問我想要啲咩，但我覺得生BB大家都有付出，佢依家都減少工作，陪緊我坐月。 」
唔想BB長大
陳凱琳指鄭嘉穎看着自兒子父愛滲出來，爭着幫BB沖涼、換片及餵奶。問到可有呷醋？陳凱琳笑說：「唔會，見佢咁錫個仔都好開心。（對個仔有咩期？）可能大家都會話想佢快高長大，但係我自己就唔捨得佢咁快大，佢實在太得意，佢好似Daddy，所以嘉穎望住佢好有親切感。（再生？）冇咁快，照顧好佢先。」
講到未坐完月已出來工作，可擔心被指為了賺錢？陳凱琳說：「唔係為錢，自己衡量過，人哋點講唔理。呢兩星期都好乖喺屋企坐月，自己貪玩出嚟同大家say hi見吓面，出嚟報過平安。嘉穎同家人都冇沒投訴，媽咪都話當出去食個lunch，吸收吓新鮮空氣。」講到有網民質疑她奉子成婚，她說：「入得呢行都明白外面會有啲說話，但係自己知自己事，唔會吓吓都回應，總之BB出世係足月嘅，出世嗰陣六磅幾重。」
|
鍾意就快D Share啦！
|
|
|