放下潘源良，53歲李麗珍不再封閉自己。
想通了，只是因她，和她。
「嗰段時間發生好多事，其中我嘅好朋友羅明珠離世，令我諗番之前Beyond家駒、陳百強、張國榮，我覺得生命原來好化學，再咁樣食藥、情緒低落，會唔會下一個就輪到我離開。跟住藍潔瑛又走得好突然，當年拍《大時代》我哋都好好朋友，後來佢疏遠咗朋友，或者係朋友疏遠佢，有段時間我婚姻又有問題，根本不可以經常抽時間出嚟見佢，今次佢突然間咁離開，忽然令我醒覺，問自己:『好難擔保下一個唔係我！』我唔想咁樣，希望將來都好好。再唔走出嚟就係等死，或者下一個係我死，我唔想死，唔想令粉絲、家人、朋友失望，我要企返起身。」帶著笑容的李麗珍，是新造的李麗珍。
現年21歲的女兒許倚榕，是她努力活好的支撐點。
「因為有佢喺度，我成日覺得自己有個責任，唔可以令佢唔開心，同埋要令佢健康成長，而家只係差少少，我已經供到佢讀大學，仲有兩年就畢業，無理由而家放棄嘛，我都要快啲企番起身，追番啲時間。
喺佢五、六歲嘅時候，見到佢喺日記簿寫上，希望媽咪唔好成日唔開心，畫咗個I love you公仔，嗰張紙我仲保留到而家，所以我諗佢五、六歲時，已經發覺媽咪有少少唔開心。唔想阿女見到媽咪愈嚟愈差，成日喊，因為阿女經常同我講：『媽咪你開心我就開心。』，佢咁樣講我好感動。」
失去愛情又如何！正如她在ig的心聲：「明白到，日子總要過…..走出黑暗，不用怕。」不再封閉的李麗珍，變得健談許多。
一邊化妝，她一邊哼著鄧麗君名曲《漫步人生路》。
「『路縱崎嶇，亦不怕受磨練』，真係每一句都講到我心聲，差唔多成首歌嘅內容都好似我行緊嘅路。」
53歲先醒覺，遲唔會遲，最緊要精彩。
「點都好，都要當係精彩嘅開始，尤其是我有個女，我希望佢從小到大，見到嘅媽咪，點樣喺高高低低嘅生活裡掙扎、奮鬥。直至今日，未知將來會唔會成功，但起碼我有做到最好，同埋以後都會做到最好，希望阿女真係感受到。因為佢嘅愛，或者係我嘅愛，可以支撐住，我已經將牛角丟掉，唔再成日鑽牛角尖。」
回復光彩，戲癮大發作的李麗珍，現在勤做Gym，除為工作，女神也堅決除污名。「我唔介意啲人重提我嘅舊事，或者覺得我以前點樣，但我而家先知道，我介意其他人點樣睇我嘅將來，我唔想以後都俾人叫肥珍、肥婆、走晒樣，我唔想其他人覺得我以後都係咁樣，我希望自己係一位成功嘅五十歲港女。其他人要講咩我都無辦法控制，但我唔希望將來再有人咁樣講，唯有自己做好啲。」
來源 source: http://nextplus.nextmedia.com
|
鍾意就快D Share啦！
|
|
|