導演麥兆輝入行以來，曾先後三次找影帝張家輝合作，前兩次因種種原因未能成事，「三顧草蘆」終一拍即合。當開拍英皇電影《廉政風雲 煙幕》初期，老闆楊受成向他表示：「我覺得有個演員你可以合作吓，佢就係張家輝。」麥導有感這個角色確實適合家輝，故通過其經理人鍾珍嘗試接觸，成功結緣！
談到張家輝這位演員，麥導坦言：「我講開要同佢合作，有行內人即刻話佢麻煩。佢接到劇本就同鍾珍講要同我見吓面，好記得當日約咗喺酒店coffee shop，當時我真係以為傾吓偈咋，點知佢成個劇本貼晒memo紙，已經做好晒功課，佢仲不斷問我問題，搞到我好似真係去咗廉署飲咖啡咁。」
麥導形容張家輝「相當細緻」，提問包括「我個角色同劉青雲咁老友，咁佢結婚我冇有去飲先？」麥導說：「我窒一窒，原來佢話如果有去飲，冇理由唔識林嘉欣，咁後面嘅情節就唔成立。我同佢講唔使擔心，大學畢業後佢同青雲各有各忙生疏咗，青雲結婚，佢係冇出席到嘅。」
「我見過真正麻煩嘅演員」
問是否覺得張家輝如傳聞般「麻煩」，麥導爽快回答：「唔係，我見過真正麻煩嘅演員，會同你講出埠拍攝時，酒店房冧把要靚、要向南，呢啲先係真正嘅麻煩。」
提起「表妹」袁詠儀（靚靚），麥導表示：「我都係以前做副導演時，同佢合作過一次咋，不過今次感覺好唔同。坦白講佢雖然只係客串，對白冗長兼『橋口』，但佢竟然可以將啲台詞邏輯合理化，絕對係演員嘅功力，佢駕馭得好好，嗰場戲連我都覺得好精彩、好好睇。佢各方面都成熟咗，亦完全唔計較戲分多與少。（下集加重佢戲分？）希望啦，咁佢同劉青雲嘅組合真係好經典。」
《廉政》上映至今累積票房已達3,068萬，成績斐然！
來源 source: http://hk.on.cc
|
鍾意就快D Share啦！
|
|
|
