蓋世寶(LuLu)在無綫工作23年，決定今個月底約滿後離開。
蓋世寶是不少人的童年回憶，17歲在無綫電視藝員進修班畢業不久，即加入兒童節目《閃電傳真機》，亦為之後的《至Net小人類》、《放學ICU》擔任主持人，無風無浪，度過18個寒暑。直至2015年，無綫要將兒童節目進行大革新，舊人全部冇得留低，蓋世寶亦由兒童節目一姐變成戲劇組「大茄」，雖說早有心理準備，但一次又一次無情的別離，卻令她好心痛。
第一次是2014年，譚玉瑛被調離兒童節目組，LuLu每次提起都激動到忍不住爆喊說﹕「我一直有心理準備要調離兒童組，好清楚所有嘢有ending，尤其呢份工，每次調整轉人(主持)，我都諗有冇我呢？我係有心理準備，反而冇諗過會係佢(譚玉瑛)，我癲咗，係好激動，好唔開心......冇事嘛，早走過我？我係有少少接受唔到。我覺得唔靚囉，可以冇，但可以靚少少。嗰時開始，我哋都知道全部冇，因為要革新，革新就係要剩番零。大家有晒心理準備，佢只係行先一步，好似講到佢死咗咁(苦笑)，但件事真係好似譚玉瑛姐姐死咗咁囉。」
而第二次是她被調到戲劇組後，由於拍劇機會不多，去年終獲TVBI的高層姜生賞識獲派做《一周八爪魚》主持，可惜做了9個月，整個製作組亦被連根拔起，蓋世寶回到公司化妝間才「被通知」。她眼紅紅說﹕「我last day嗰日，受訪者(翟威廉)都到咗，喺化妝間突然話冇咗，咁化妝師問我『仲化唔化呀？』咁唔化啦，無謂浪費人哋精神，個樣都用唔着。其實我同佢哋(TVBI)唔算好熟，只係做咗九個月，我份人比較慢熱，儲到少少感情就散，連姜生都走埋。」
多年來，蓋世寶亦有機會離開兒童節目組，但不少人都提醒她「Drama(戲劇)唔適合你」，她解釋﹕「因為唔夠假，或者唔好用假，應該話係你太有性格，好快就撈唔掂，做Drama要好識做人，我唔夠。」
蓋世寶直認多年來亦試過得罪人，問到是否傳聞中的譚玉瑛姐姐？她哈哈大笑說﹕「真係冇，好搞笑。大家都當佢係大家姐，佢好鍾意教人㗎，哈哈哈，有乜嘢我哋都會煩佢，乜都『阿譚阿譚』，佢就話『唔得，你咁咁咁，你又咁咁咁』，帶領住我哋。其實佢算係我分享得最多嘅對象，因為大過我信得過，反而同輩未必信得過。」
不少傳聞都指蓋世寶脾氣差，當年她與鄧健泓拍拖，更傳過「刀仔拮大髀」令男方受傷。她澄清﹕「呢啲都信？我哋仲係朋友，件事冇呀，唔記得喇，係唔小心，唔係呢幾個字眼囉，冇咁激！」不過，蓋世寶亦直認自己是野蠻女友，但不是無理取鬧，而是有理直講，她說﹕「最野蠻咪嗌交嗰陣，嗌交梗係要贏，唔通打和握手咩，為啖氣，我唔會屈住。」
至今仍是單身，問到身邊有沒有追求者，蓋世寶輕撥頭髮，風騷地說﹕「keep住都有。」她覺得感情要看緣份，未有「叮」一聲，寧缺勿濫，但卻令媽媽好擔心，她說﹕「我係孻女，有兩個家姐同一個細佬，但得番我未結婚，所以媽咪最擔心我，成日覺得我任性。」蓋世寶是在單親家庭中長大，雖然廿幾歲便買樓，但至今仍是要供，所以失去一份穩定職業，必定令媽媽更加擔心。她說﹕「而家都未同媽咪講，諗住當面同佢講，其實我比較好彩，03年沙士買樓好平，但之後因為屋苑唔養得狗，所以賣咗，租咗幾年先買番，我現在嘅目標係供完層樓，同繼續畀錢媽咪，但我今次離開(無綫)其實乜plan都冇。但我平時好慳，離開兒童組後，我都即刻cut咗架車同其中一份保險，我屋企連寬頻都冇㗎，電話都無限上網，我又唔係成日玩手機。」
問到為何如此決絕離開TVB？LuLu說﹕「其實去咗戲劇組後，我每年都減薪，真係唔夠生活。今年1月1日公眾假，公司1月2日打畀我傾約，但現在成績唔係太理想，所以公司就咁咁咁，我都好快決定，因為我睇唔到前面有更多路，好似拍拖咁，冇將來不如算！」
後記﹕
好多人都覺得蓋世寶個名好有霸氣，問是否真名？蓋世寶說﹕「或者大家記得我嘅原因，係因為我個名幾霸道，初入行時個個都想知我係邊個，有人以為我係男仔。咁我爸爸姓蓋，我哋呢輩都係跟族譜。」
採訪﹕嵐山
攝錄﹕林德雄、仇志中
精選娛聞，喺晒《娛果》
http://fb.com/appledailyent
第二屆最港電影大獎投票網址
https://bit.ly/thekongestfilmawards2018
10萬蚊 100人分！
星期一至五晚上10點半
《動腦Q》Let's Q the money！
http://bit.ly/2QW8LcI
| 被批唔適合做Drama 離巢蓋世寶：因為我唔夠假。(攝影﹕林德雄) | | |
| | | |
| | | |
| | | |
| | |
|
鍾意就快D Share啦！
|
|
|