曼聯喺歐聯戲劇性淘汰巴黎聖日耳門(PSG)殺入8強，完場前嘅12碼無疑係決定性，亦引嚟唔少爭議，賽後PSG球星尼馬喺社交網留言痛批：「恥辱！歐洲足協搵4個完全唔識波嘅人去控制VAR，呢個12碼根本唔存在！打中背脊點解會係手球？食X屎」
前英超球證希斯亦認為曼聯呢個12碼好夠運：「如果我控制VAR嘅話，一定唔會建議球證翻睇，VAR係用喺明顯而清晰嘅錯誤上面，呢個並唔係，點解球證唔夠膽貫徹自己最初嘅決定(冇12碼)？球員要有意圖移動手臂去掂個波先至係12碼，唔理手球嗰刻處於咩位置，我認為呢個手球並唔係蓄意。」
估唔到嘅係，里奧費迪南、奧雲同夏格維斯3位前曼聯球員，都話呢個12碼係唔值得，里奧費迪南表示：「派斯奴甘佩比根本冇得避，我唔明啲人話後防要將對手收喺背脊後面嘅講法，咁樣踢波點會拎到平衡？唔好搞錯，我好開心曼聯晉級，但我唔認為呢個係12碼。」夏格維斯就呼籲VAR成員應該引入退休球員，咁樣可以幫助球證明白球員嘅處景。
不過，另一位前英超球證比德禾頓就有唔同睇法：「派斯奴甘佩比將隻手張開後擰轉身，但佢冇打算為自己隻手負責任，根據呢一刻嘅球例，咁樣就係12碼。我知道歐洲足協會喺6月修改有關手球判罰嘅條例，但以目前球例呢球就係12碼。」
至於名哨卡頓保就分析球證嘅考慮過程：「首次，球證只係依從歐洲足協嘅指令，即係球員隻手伸開，而且係喺一個『唔自然』嘅位置，呢方面球證決定係一致嘅。不過我明白PSG點解咁憤怒，呢個手球喺英超出現一定唔會有事，派斯奴甘佩比並唔係蓄意手球，用慢鏡睇手球永遠都覺得好肉酸，但用實際速度去睇，派斯奴甘佩比根本想縮但縮唔切。」
東網體育FB同你追實體壇每個精彩時刻！
http://bit.ly/2ecTF2A
支持本地運動員，一齊去「睇體」！
https://bit.ly/2DxX4XI
|
鍾意就快D Share啦！
|
|
|
