喺《愛‧回家之開心速遞》入面飾演OL洋洋嘅劉思希，因為正喺科技大學修讀EMBA課程，被指為圈中高學歷藝人之人，結果引嚟一場茶杯裡嘅風波。
先係林作一番「港人過度崇拜高學歷」言論，點知搞到一眾網民插林作白鴿眼，連張堅庭都挪揄林作勢利。而林作亦作出反擊，指張堅庭扭曲咗佢嘅意思，要求對方道歉，就係咁互相駁火，反而當事人劉思希無出過半句聲。
咁又係，拍劇讀書兩兼嘅佢，已經辛苦到爆，仲邊有閒情理咁多是非。據聞佢成日讀書做功課，讀到三更夜半，幸而得珍姐體諒，喺《愛‧回家之開心速遞》嘅戲份有得遷就。不過就算開工，等埋位時佢都爭取時間溫書，應付考試。
身兼兩瓣，休息唔夠，代價就係搞到面青青。呢日佢shopping，面色都有啲蒼白，佢好似趕時間咁，快快手揀幾件就走人。連醫肚都唔可以坐低好好享受，買個外賣，就摩打腳咁離開。
好鍾意讀書嘅劉思希，入行前喺美國西北大學同林肯大學，修讀行政管理碩士，及工商管理碩士，畢業後曾經喺一間公司當市場總監。依家33歲又肯花過百萬，修讀為期18個月嘅EMBA課程，佢話:「人生，就是一場又一場同自己的比賽。」捱到面青青都唔放棄，如此好學嘅心，其實已經值得一讚
來源 source: http://nextplus.nextmedia.com
|
鍾意就快D Share啦！
|
|
|
