現年57歲的麥翠嫻，83年畢業於亞視第一屆藝訓班入行，甫出道便擔正做女主角。曾經是亞視前老闆、已故邱德根愛將的麥翠嫻，早前接受《蘋果》專訪，也難忘在亞視當花旦時，經歷自己帶廁紙、鉛筆返工的日子。難得的是，麥翠嫻在老公生意失敗時，她繼續發揮賢內助本色，默默在旁守護。
採訪：嵐山
攝影：沈健程
相關新聞：【蘋聞重溫】《八美圖》花旦多息影嫁人
亞視昔日當家花旦麥翠嫻，當年藝訓班畢業後風頭一時無兩，拍第一齣劇集，便跟李影、禤素霞、魏秋樺、蔡瓊輝、馬敏兒、葉玉萍和蔡倩兒八名花旦，合演電視劇《八美圖》。當年美國前總統卡特（Jimmy Carter）伉儷到港參觀亞視，麥翠嫻更可以陪老闆邱德根獻花。
私人醒利是
回憶往事，麥翠嫻一臉自豪地說：「咁多朝，得邱生係有盈餘，當年真係自己帶廁紙同筆返工，因為規定每日用四格廁紙，筆要用完攞番舊嗰支筆芯去換。以前大家覺得佢好孤寒，其實佢好前衞，響應環保，睇到好多嘢。記得以前台慶，邱生會派每人一封遠東銀行嘅5元利是券，但開戶係要10元，哈哈，佢思維就係要你唔准懶，唔勤力就會嘥咗5元，員工亦好醒，集腋成裘開一個戶口攞錢。但邱生就好睇得起我，專登叫『翠嫻、翠嫻』，跟住就喺西裝暗格拎咗一封利是，原來係300元現金利是，我拎住封利是都好感動。」
90年代，麥翠嫻被無綫挖角，過檔後第一部演出的劇集，便與當時得令的藍潔瑛和商天娥合演《摘星的女人》。90年代末，麥翠嫻與商人龔汝華結婚後息影，婚後育有一女一子，她說：「當年冇唔捨得，唔同階段就做唔同嘅嘢，結婚後就要家庭行先，要對小朋友負責任，由幼稚園、小學、中學我都follow住。」
相關新聞：【復出登台】拍港台劇過足戲癮
仔女拒入行
現時大女Vicci已經22歲兼大學畢業，21歲細仔Katio則在瑞士讀酒店管理，最近返港實習。問到仔女有沒有想過當「星二代」？麥翠嫻說：「佢哋都有音樂同藝術細胞，阿女讀中學嗰陣已經有參加校內嘅choir，同女拔比賽贏過一次。佢仲參加過『Opera HK青少年團』，即係莫華倫嗰個，又同羅馬劇院有合作演出。但𠵱家大個咗，佢鍾意金融管理，入咗ibank。而阿仔就讀酒店管理，佢哋都係想專注自己嘅工作多啲。」
說起仔女麥翠嫻立即露出甜笑，但其實麥翠嫻夫婦曾經歷生意失敗，近年已東山再起。麥翠嫻稱小時候家貧，甚麼苦都捱過：「我有四兄弟姊妹，我讀幼稚園已經要孭住最細嘅細佬一齊返學，人哋睇就好易，我仲要幫屋企做家頭細務，同做手作仔賺錢。煮飯、換燈膽、電視駁線、木工乜都難唔到我㗎。」
與丈夫龔汝華結婚逾20年，麥翠嫻表示仍然好恩愛，如今仔大女大，她除了幫丈夫打理鐘錶生意外，幾年前還復出登台、拍港台劇和參演舞台劇。早前更與一班舊亞視之友小強甄志強及十一哥何國材等合演音樂劇，又應邀演出港台劇《運輸背後》，自言過足戲癮。
場地提供：嘉力斯鐘錶公司
|
鍾意就快D Share啦！
|
|
|