- 【飛東京影海報】黃偉文形容為又pretty又crazy 容祖兒8月紅館開20周年個唱
- 19分鐘前
0
入行廿周年，容祖兒將於今年八月於紅館舉行《PRETTY CRAZY 容祖兒演唱會》，早前佢特別飛東京影演唱會宣傳海報。祖兒謂演唱會名字PRETTY CRAZY 是好朋友黃偉文為她定的，「個名真係起得好好，因為呢廿年來無論係工作上、不同經歷上面，一路走來都真係PRETTY CRAZY嘅！PRETTY CRAZY呢兩個字，既可以代表到我哋對工作上面嘅CRAZY，又可以代表到我哋一直努力追求嘅優雅，簡簡單單兩個字形容左我呢廿年，Wyman真係勁。」今次演唱會海報，係搵番祖兒初入行二十歲第一次開紅館演唱會合作過嘅攝影師Leslie kee 紀嘉良合作，祖兒謂:「呢個合作，又係有齊PRETTY CRAZY元素！其實係去年東京睇明哥(黃耀明)演唱會，突然諗起Leslie，就即刻約咗佢出來半小時，一個下午茶咁就已經定咗喺今年一月影呢輯相。因為大家工作時間關係，我只係用咗一日飛去東京，24小時crazy完成呢次海報。影左好似有超過12個小時，一落機就去影相，影完就上機走。所有衫及形像設計，都係Leslie一手包辦，佢細緻到每套衫都要我換埋指甲襯色，真係未試過咁影法。但係完成作品，當然係very pretty啦，影咗好多套衫，多到返來香港，剩係揀相都揀左好耐，張張都咁好，唔知點揀。最後經過公司所有同事投票，最終好開心揀咗我最鐘意嗰一張用先。之後大家重可能睇到好多唔同款海報。」
今次是廿周年紀念演唱會，祖兒話諗番起當初廿歲第一次係紅館的感覺真係好crazy，當時佢係唔相信會有人來睇自己演唱會，「咁廿年後今次，係我第十個紅館演唱會啦，crazy就交比歌迷同觀眾啦，我就負責pretty話就話八月先係演唱會，但係我已經開始準備，keep好自己身體，準備最佳狀態，唱最好嘅歌，跳最正嘅舞比大家睇 ，我希望今次唔好咁瘦，因為累積多年經驗，我發覺做演唱會最緊要係體力同健康，太瘦就冇營養又唔夠抵抗力去戰鬥，所以keep fit 同調理身體係會同步進行，唔會比自己病。」另外祖兒又話，「我發覺香港人真係一年閒閒地睇十個八個演唱會，所以今次我團隊都會盡最大努力，去製作一個令大家一進場就覺得前所未有，同以往完全唔同嘅演唱會。目的係比大家睇到我呢廿年進步。究竟會點搞？就係祕密住先，等觀眾入場就會知道點pretty，點 crazy ！」為了紀念廿周年，祖兒今次也特別邀請了五代十國設計了一個代表這廿年的logo，logo裡面以JYj及20字樣， 砌成了她最愛的鬱金香。
來源 source: http://nextplus.nextmedia.com
|
鍾意就快D Share啦！
|
|
|