周三(3日)凌晨英超，曼聯作客狼隊，曼聯由麥湯米尼先開紀錄，但盧卡古、連加特分別錯失入波黃金機會，費特洛迪古斯「送禮」助攻，老將艾舒利楊格被逐，加埋基斯史摩寧擺烏龍，繼英足盃之後，曼聯再次1:2不敵狼隊。
曼聯上半場初段攻勢唔錯，開波5分鐘，達洛治右路傳中，但盧卡古近門頂得太正，被狼隊門將魯爾柏迪斯奧擋出。
13分鐘曼聯終於先開紀錄，麥湯米尼禁區外偏右位置起腳，割草式直飛死角入網，非常精彩，亦係呢位22歲蘇格蘭小將首次入波。
轉個頭，盧卡古左路傳中，連加特近門冇人看管下，竟然頂個冇力度，又冇角度嘅頭槌，被魯爾柏迪斯奧撲出。
曼聯把握唔到呢拉開紀錄嘅好機會，跟住就出事，24分鐘迪基亞開出地波龍門球，費特洛迪古斯冇壓力之下，竟然控甩腳，被對手截到打反擊，迪亞高祖達單刀射入，為狼隊扳平1:1。狼隊之後仲有反超前機會，但丹當斯卡近門射高，魯賓尼維斯遠射被迪基亞接實。
臨完上半場，盧卡古禁區內射遠柱出界，似乎已注定要失分。更弊係56分鐘，艾舒利楊格使出「收山腳」飛鏟對手迪亞高祖達，5分鐘內累積第2張黃牌被逐。
曼聯踢少１人，攻勢更加乏善可陳，保羅普巴踢到無厘神氣，似足「寸王」摩連奴執教時期一樣。
結果踢到76分鐘，紅魔鬼防線再次失陷，狼隊左路傳中，基斯史摩寧解圍唔到之餘，仲擺烏龍，搞到輸1:2，呢位中堅臨完場前更幾乎第2次擺烏龍，好彩迪基亞反應快撲出。
如非艾雲卡華利路勁射中楣彈出，曼聯唔止輸1:2，蘇斯克查坐正第2場比賽就輸波，曼聯領隊呢「三煞位」真係難頂。
曼聯現時同第4位熱刺同分，領先第6位車路士1分，但由於曼聯比呢兩隊踢多1場，今場輸波之後，爭前4位機會非常危。
東網體育FB同你追實體壇每個精彩時刻！
http://bit.ly/2ecTF2A
Follow東網體育IG一齊撐本地運動員！
http://bit.ly/2EYxoRh
|
鍾意就快D Share啦！
|
|
|
