「我自細都教佢哋（子女），屋企人最緊要，你知屋企係點就得，其他人點講唔使理。」大劉劉鑾雄妻子、華置（127）主要股東「甘比」陳凱韻，今日首次以執董身份現身華置股東大會後，罕有與財經傳媒聚餐，席間講到自己教仔心得，強調自己不做怪獸家長，會放任子女發展興趣，又透露大女首嘗做生意滋味，「佢賣鬼口水有10萬收入，最後佢將成筆錢捐去慈善基金。」
甘比與大劉現時育有兩女一子，現已10歲的大女劉秀樺（Josephine），年紀細細已甚有生意頭腦。去年暑假期間，迷上小朋友界潮物「鬼口水」（Slime），後來發現產品在朋友間大受歡迎，於是決定「創業」做生意，創立自家品牌「Chorus Slimes」，不單開IG Shop，華置旗下嘅皇室堡更設鬼囗水自助售貨機。
甘比透露，女兒自去年9月「創業」至今，已累積收入10萬元，亦全數收入捐予劉鑾雄慈善基金，甘比笑言，「佢都有學到野，因為初初以前佢未當係一個生意既時候，佢係買咩就買咩，見到靚就買；咁宜家佢知道係做生意，佢會去計錢囉，同埋佢會知道，買一打係平過兩支既，咁佢就買夠四打，自己格價。」
事實上，甘比近年亦積極為大劉管理「劉鑾雄慈善基金」，自己不時會留意新聞，一旦發現有家庭需要應急支援，亦會主動提供協助，「上年睇新聞，見到個媽媽俾架車撞斷腳……」一提到36歲媽媽杜穎楠，去年於荃灣梨樹路遭寶馬房車接斷雙腳此宗意外，甘比隨即眼泛淚光，語略帶哽咽，「唔好意思，我做媽媽所以我知。」甘比表示，慈善基金當時就杜穎楠個案，聯絡上杜穎楠的姐姐。雖然當時杜表示自己有足夠能力應付，婉拒基金會幫助，但她其後主動提出樂於成為基金會義工。甘比又透露，1997年成立至今，已捐出逾40億元，基金主要收入來自大劉捐款。
「其實佢（大劉）又好怕醜又好低調，呢層你地唔明白架啦。」甘比表示，其實大劉不時都有低調捐錢，「以前做時，佢成日都無出聲……但病咗之後就覺得要講，因為講咗先會帶動到其他人。」
身家以數百億計，更曾奪本港女首富寶座的「甘比」，於1999年曾於《蘋果日報》做娛記兩年多，講到入行經過，她表示當年一直希望做記者，其後《蘋果日報》請娛記，列明經驗不拘，當時預科畢業的她就決定應徵，「我好記得當時蘋果夜晚9點幾打電話嚟，問我幾時可以見工，我話即刻。」見工成功，此後就「甘比」筆名行走江湖。「嗰時我好鍾意睇套卡通片《娛樂金魚眼》，咪有條識飛嘅金魚叫Kimbee嘅，係咁樣嚟嘅。」她坦言，「有時都會掛住做記者呢行…我都同個女講，第時如果你想做記者，媽咪可以同你一齊做，我覺得我仲做到架。」
大劉早前入稟高等法院，申請對政府建議的《逃犯條例》修訂作司法覆核，劉表明一旦修例通過，或流亡海外。被問到未來會否安排子女到外國留學，甘比表示，「太早我又怕唔捨得，都係到大學先諗啦，同埋我都想佢哋學好中文先。」
記者：倪敏慧
【六四30】守住歷史 拒絕遺忘
https://hk.adai.ly/zdzKtt2RiW
|
鍾意就快D Share啦！
|
|
|