處女黨係爭你咋！
藝人鍾嘉欣最近回港工作，更順道四出探望好友，繼早前嘅《華麗轉身》及《溏心風暴》飯局，呢日佢又再出動，約埋「Amazing Esther」嘅一班姊妹王君馨、苟芸慧及李亞男，嚟個「處女黨」Re-U。
王君馨喺社交網上載聚會合照，佢透露今次搞搞新意思，唔再留喺屋企食飯咁簡單，反而係齊齊去行街，完全唔怕畀途人認出，果然做晒人妻同人母真係零舍大膽，難怪君馨都笑言：「第一次成班姊妹喺街度行嚟行去，原來真係好爽！之前淨係係屋企聚會，或者小人的餐廳，今次好放縱。」
雖然啱啱升呢做媽媽嘅岑麗香（香香）缺席，不過嘉欣就帶埋BB嚟，氣氛一樣咁熱鬧。唔少網友都話好掛住香香，好想見到佢哋五姊妹「合體」！
除咗同好姊妹聚會，嘉欣亦有帶埋兩個仔女同馬浚偉見面。佢喺社交網分享馬浚偉同仔女嘅合照，雖然佢用心心圖案遮住仔女個樣，但依然見到馬浚偉露出慈父笑容，又抱細仔Jared，又同大女Kelly玩，相處十分融洽。嘉欣以英文留言大讚對方：「這個男人對我而言是與眾不同的，我們沒有血緣關係。我們曾一起合作拍攝5部電視劇，他從不要求任何回報。當我沒有得到應有的待遇時，他總是為我挺身而出。他很好人，他很溫柔，他有正義感，他很聰明，他是一個很好的朋友，對我來說就像哥哥一樣。」
來源 source: http://hk.on.cc
|
鍾意就快D Share啦！
|
|
|