掃呢頁CODE去手機

2019年5月10日 星期五

【回望轟烈愛情】鄧萃雯剖白:會焚燒到死 我都失敗過好多次 __,鄧萃雯,

相隔六年,鄧萃雯接拍了ViuTV的新劇《婚內情》,在劇中飾演陳錦鴻太太,兩人結婚20年,人妻鄧萃雯願意跟第三者共存,為的是希望婚姻能夠走到尾,在她眼中 ...




相隔六年,鄧萃雯接拍了ViuTV的新劇《婚內情》,在劇中飾演陳錦鴻太太,兩人結婚20年,人妻鄧萃雯願意跟第三者共存,為的是希望婚姻能夠走到尾,在她眼中是一個完美句號。

入行三十年,鄧萃雯有不少轟烈愛情,曾經以為戀愛就是生命全部,不過都是陳年舊事。仍然單身的她,剖白失敗過多次後,她追求的是細水長流的愛情。

「唔同嘅人生階段係唔一樣嘅,你要滿足嘅嘢都唔一樣,以前嘅我,好鍾意戀愛,浪漫嘅時候,當時係烈女階段,就會覺得要愛到好轟烈,要燃燒得好勁先算愛情,我唔記得大約到幾耐之後,開始發現,我終於都明點解要細水長流,淡淡地,唔使經常都好激情嘅,同埋慢慢都會睇到,可能小時候唔係太知道愛係咩嘢,即係愛唔淨係好掛住,好鍾意,有時候你搵到一個好愛嘅人,未必適合做伴侶。因為你會焚燒到死,因為人無咁多力可以不斷燃燒,有時都要抖下,睇下可唔可以安定,我慢慢開始,年紀比較成熟,遇到嘅事情多咗,自己嘅經歷多咗,明白咗愛係咩嘢,知道愛並唔係淨係得好嘢,係包含埋衰嘢,要連衰嘢都接受先至係愛。聖經都有講,如果淨係愛喜歡你嘅人,呢種邊係愛。」她說。

鄧萃雯是虔誠基督徒,認為愛是包容與寬恕。對於劇中人妻馬淑湘在婚姻中的屈就,她在開拍前,做了不少資料搜集,原來有些女人可以接受不忠婚姻,尤其是已經有子女,又或沒有經濟基礎,更加會容易屈就。

會發生在鄧萃雯身上嗎?

「呢件事就唔會發生,因為我唔會嫁呢個老公,我小時候係好鍾意嘅,因為佢好有才華,但係我亦都好快就知道,有才華嘅人其實都好難頂,因為我肯定好自我、 自戀、 自私,呢三個自係難成為佢伴侶嘅,只可遠觀不可褻玩。」她笑言。

跟才華型男朋友拍拖,鄧萃雯自言有過不少失敗經驗。她形容:「我覺得一個會失敗嘅人,先至係一個真實嘅人。」以為戀愛就是全部,多年前,鄧萃雯停工,在美國小休讀室內設計課程,跟男友和他的家人一起生活,她說這是唯一一個令她有結婚打算的人:「我試過一段比較穩定嘅關係,就喺美國讀書嘅時候,有諗過嗰男朋友會成為我老公,亦係我入行後。因為自小唔係同屋企人住,由爺爺嫲嫲照顧,唔係一個好正常嘅家庭,我由入行開始已經係一人生活,從來唔係按時食飯嘅人。你知道拍戲基本上係無規律嘅,突然拍咗七年戲之後去讀書,同男朋友,佢嘅屋企人一齊,係要按時食飯,有晒規律,放學遲咗返嚟要打電話通知,對我嚟講係已經係好唔適應。」

多年後,她指自己不斷反思,原來人家是正常生活,她才是有問題,像她一個這樣愛做戲,很享受一個人時間的人,是需要很多獨處空間。

「要搵一個容許我咁嘅戲癡嘅人,其實好困難。」她說。

她言之後的日子,跟前度離合多次,已經沒有想過婚姻:「佢係唯一一個我考慮過,因為佢實在對我忠誠。因為對我嚟講,自小爸爸媽媽離婚,呢個其實都係我,一直成長到而家嘅一啲傷口,對婚姻係比較無安全感,所以一定要遇到一個,無論點樣都唔會同我分手嘅,先會覺得安全啲。」


鍾意就快D Share啦!