- 洛杉磯拍音樂特輯 容祖兒三餸一湯餵飽團隊
- 36分鐘前
為慶祝踏入樂壇二十年，容祖兒除咗八月舉行演唱會，早前她更與同佢並肩作戰廿年嘅英皇娛樂演唱會部策劃及總監馮貽柏、演唱會音樂總監何秉舜、導演彭秀慧，飛到一個對佢別有意義嘅地方-美國洛杉磯，拍攝音樂特輯《LOVE IN L.A.》，呈現佢鮮為人知嘅一面。
音樂特輯於日前播出，選擇到洛杉磯拍攝，因為呢個地方同祖兒好有淵源，佢仲留過唔少腳毛同汗水喺度，「最印象深刻一定係我啱啱出道時我媽咪陪我嚟呢度受訓，噚日我阿媽好搞笑咁話：『當年我同你去美國時嘅年紀，就係你而家嘅年紀。我好開心，到而家仲可以睇到你呢個節目。』我都唔知好嬲定好笑，因為真係唔一定可以（睇到）㗎嘛，都廿年啦，所以我係懷住一個好開心嘅心情去拍呢個音樂特輯。」第一站佢哋去到著名嘅錄音室「PARAMOUNT RECORDING STUDIOS」重新錄製對佢音樂路上最重要嘅五首歌，包括：《未知》、《痛愛》、《隆重登場》、《牆紙》及《長大》。
之佢就去咗穿耳，原來呢個係佢三十幾年嚟嘅「心願」，祖兒話佢第一次穿耳係四歲，到中學時，因為見到鄭秀文穿耳骨好靚，於是就走去穿，不過即晚被媽咪叫佢除低，「到咗今時今日，我人在美國，佢（媽咪）阻我唔到㗎」不過向來孝順嘅祖兒都有即刻拍片俾媽咪睇，因為「身體髮膚，受之父母」。
隨後佢又拜訪十二年前嘅跳舞老師、於海邊busking、挑戰用一百蚊美元買歌衫等等，不過最係佢令人意想不到嘅，係佢為團隊親自下廚。佢一邊買餸一邊透露自己對入廚比較吝嗇，坦言入廚嘅原因只有一個，「就係拍拖。」之後佢仲facetime要媽咪教路。喺整理食材時佢又笑說：「其實我覺得如果呢一餐飯煮得好嘅話，對我嘅人生幸福有好大嘅幫助！」落鑊時，佢仲表演「拋鑊」，功架十足。完成三餸一湯後，祖兒仲用番自己嘅歌名為餸菜命名，好似「十六號蝦仁炒蛋」、「西蘭花千樹帶子」、「黃色咖喱大門」，不過節目就冇播出工作人員嘅comment，唔知味道係點呢？
來源 source: http://nextplus.nextmedia.com
|
鍾意就快D Share啦！
|
|
|