唔止女大十八變，連仔都愈大愈靚仔！
經典武俠小說《倚天屠龍記》拍過唔少版本，最新嘅大陸版現正熱播中，無論服裝、化妝、布景到道具，都備受網民大讚製作認真，成為全城熱話。不過，有讚就一定有彈，有網民就覺得劇情拖得太慢，仲話連最精彩嘅武打場面都用咗慢鏡演繹，唔講以為睇緊粵語殘片喎！好彩劇集嘅演員夠靚仔、靚女，仲好有青春氣息，尤其飾演男主角「張無忌」嘅21歲曾舜晞，被封為「嫩版陳偉霆」，成為市場最新鮮嘅「小鮮肉」！
正所謂人紅多是非，有網友摷番曾舜晞嘅舊相，直指佢整容，最令粉絲心碎唔單止整咗容，重點係當年無論佢嘅髮型、造型，甚至影相嘅表情，都Chok到似足大陸東門Style，驚嚇度絕對達五粒星！有網友乘機問佢搵開邊個醫生，大讚手勢掂，認真抵死！
而同劇飾演「周芷若」嘅大陸女星祝緒丹，亦被指進化成功，由昔日扁鼻、21:9闊面轉化成五官立體標致，可謂女大十八變呀！現年27歲嘅祝緒丹憑劇集《三生三世十里桃花》而人氣急升，原來17歲早已參加選美比賽入行，仲攞過唔少獎。
來源 source: http://hk.on.cc
|
鍾意就快D Share啦！
|
|
|