李泳漢（右）同細佬李泳豪嘅拉麵店今日舉行開幕儀式喇！
藝人李泳漢同細佬李泳豪於旺角開設嘅「阿久根和牛拉麵屋」，今日舉行開幕儀式！媽媽施明、爸爸李家鼎、李泳漢太太Conny同囝囝Alfie及囡囡Charlotte、藝人楊明、安德尊以及易智遠等到場支持，吸引多名市民圍觀，場面熱鬧。
三父子拍住上
泳漢同泳豪兩兄弟話係第一次合作，喺籌備過程冇鬧交，一切都好順利。之前泳豪同朋友夾份開咗間和牛立食店，所以呢次其實係第二間分店，佢話：「我哋每人各自投資咗六位數字，不過都仲有其他拍檔嘅，其實呢間係第二間分店，之前嗰間就係和牛立食，呢一間就係拉麵店。（和牛拉麵？）都有，但其實我哋最出名係蝦拉麵。」
日本拉麵帶返嚟香港
問到爸爸李家鼎有冇試過味？泳豪說：「佢未試過，但有畀意見教我哋點做，我哋出啲辦嘅時候都有畀佢睇，我拍檔本身都想搞拉麵，咁啱我又想，加上我又鍾意去日本。」泳漢又話因為細佬成日去日本飄移，覺得日本美食文化好好，所以想將日本拉麵帶返嚟香港，問到佢哋三父子係咪想創立飲食王國？泳漢笑言：「唔敢講，爸爸勁好多。」泳豪則指承大家貴言，依家自己都係學習當中：「我鍾意咗做生意，依家都係邊做邊學，去學習經營。（會唔會好難分配時間？）我依家拍緊《愛．回家之開心速遞》，都係朝9晚5，夜晚收工就會過嚟。」
再開分店
講到會唔會遲啲搞上市？泳漢指要慢慢嚟，泳豪目標話想開多4至5間分店：「呢幾年內想開多4至5間，都會喺番旺角區，港島嗰邊都有傾過，但租金貴啲。」泳漢則表示現時拉麵店麵係處於試練階段：「依家拉麵店都會一直有新嘢推出，試吓大家反應，睇吓香港人口味係點。」
唔提楊思琦
講到楊思琦近日推出新歌時談到昔日同泳豪一段情，對此泳豪表示：「唔回應。」而泳漢則指：「今日係開心日子唔講呢啲。」
來源 source: http://hk.on.cc
|
鍾意就快D Share啦！
|
|
|