勞工及福利局局長羅致光早前提出60歲中年論，現年94歲、獲健力士世界紀錄確認為最長壽DJ的Uncle Ray（Ray Cordeiro），應該是個「幾後生」的老人家。由49年在麗的呼聲開咪至今，Uncle Ray做DJ已經70年，現時周一至周五仍風雨不改主持節目，皆因音樂就是他的生命、他的快樂之源，他笑言自己幾懶，每日做節目就當作是運動。
採訪：戴彩煥
攝影：陳俊強
相關新聞：訪問披頭四：叫佢哋去紅燈區
有「樂壇教父」之稱的Uncle Ray，中文名郭利民，是香港土生土長的葡萄牙籍人士，入行70年的他訪問過的粒粒都是國際級天王巨星，包括披頭四（The Beatles）、Bee Gees及艾頓莊（Elton John）等，香港的許冠傑（Sam）、羅文也是Uncle Ray提攜走紅。
數十年前，Uncle Ray已屆退休之齡，但他仍繼續在周一至周五晚，為香港電台主持節目《All The Way with Ray》至今，因為音樂就是他的生命、他的快樂之源。Uncle Ray日前在其廣播道寓所接受《蘋果》專訪，問到他何時退休，會否希望做到120歲？Uncle Ray笑說：「120歲？我真係唔信，如果可以120歲，我第一個排隊。我冇諗到做到幾多歲，最緊要身體，希望一路做。我多謝我阿媽，佢死之前話：『阿仔，我喺邊度都好，我一定會睇住你。』我知我有乜嘢好彩，都係多謝我阿媽。」
消夜食快餐店
這個最長壽DJ的長壽秘笈，Uncle Ray未有特別提供，皆因他做節目做到凌晨，總是「遲睡遲起」，雖不吸煙，但偶爾也會嗒番杯紅酒，飲食方面不愛清淡，也不愛做運動。他笑說：「我個人都幾懶，冇做運動，游水就有。」他又指：「我做節目之前就唔食嘢，我晏晝起身（約下午1、2時）就食一餐，咁就捱成日。夜晚做節目我就好開心，乜嘢事都冇（指肚餓），做完節目就同契仔Andy（周舜河）同隻狗仔出街消夜，我鍾意食雞翼，就喺快餐店買雞翼。」
體力和記憶力，都是令長者困擾的問題，但年屆94歲的Uncle Ray仍可以獨自一人做深宵節目做足三小時，其實他曾多次通波仔，在九年前曾接受換二尖瓣開胸手術，又裝了心臟起搏器，明年便到期更換。年紀漸大，記憶力也開始衰退，甚至面臨腦退化，可曾擔心自己遇上那一天？「我聽就聽得多，我希望我唔會有咁嘅事。我諗都冇諗到我自己會有事，我晚晚做三個鐘頭，一個星期五晚，諗都冇諗過我會暈，可能夜晚節目係我exercise。做呢個節目有時好sad，有個聽眾晚晚打電話嚟同我傾偈，忽然間停咗，原來佢過咗身喇。」Uncle Ray欷歔地說。
除了做節目，Uncle Ray也拍過不少電影，包括《摩登保鑣》、《失業生》和《我愛夜來香》等：「許冠文同Sam嘅電影我做咗6套，許冠文話我係lucky man，有我就發財啦。」對演戲可曾有興趣？Uncle Ray扁一扁嘴說：「冇乜興趣，都係玩吓咁，唔係特別鍾意。」
相關新聞：【開咪70年】訪問粒粒巨星
| | | |
戴帽做Image
Uncle Ray的家是個大寶藏，有2萬張極珍貴兼絕版的黑膠唱片，牆上掛滿當年披頭四給他的親筆簽名雜誌，當然也有一大堆心愛的帽子：「一個人要有一個image，有啲特別嘢，我就戴帽喇。」訪問當天，Uncle Ray便戴上自己最喜歡的藍白色畫家帽。至於家中2萬隻黑膠碟，現在都變成「收藏品」，閒時只會聽CD和上YouTube：「我搵新歌，或者搵舊歌，由啲新人彈，睇吓點進步。」
至於家中珍藏將來會送給誰，還是交由甚麼機構保管？Uncle Ray想一想說：「我好多謝我契仔Andy，冇佢我冇可能做到咁耐，佢幫我搞掂晒啲嘢，我諗都冇諗過玩電腦玩CD，佢教我玩電腦，教我set up好，教我上網WhatsApp。我啲嘢都係留畀Andy㗎喇，佢都係好鍾意音樂，佢又幫我打理我啲collection。」
契仔照顧開咪
Uncle Ray的54歲契仔Andy，85年擔任他的助手，88年出外發展自己事業，曾是九倉電訊旗下EC電訊總經理，06年提早退休全副精神照顧契爺。訪問當晚9時許，Andy駕車接載Uncle Ray到港台，準備主持晚上10時至凌晨1時的節目。一入直播室，Andy即為Uncle Ray設定好電腦播放歌單，待開咪後15分鐘，Andy便先行離開，讓他獨個兒在直播室開咪撳掣播歌。Andy輕輕的說：「畀佢自己handle番，對佢嚟講係一個好好嘅exercise。」Andy後來還告訴記者：「其實Uncle Ray有食靈芝孢子㗎。」
|
鍾意就快D Share啦！
|
|
|