馬上成為壹會員
會員專區 只限會員閱讀
1998年12月6日，大賊張子強在內地被捕遭槍決。當年與張子強一起策劃綁架李澤鉅、郭炳湘的劉鼎勳，則被判無期徒刑，因在監獄行為良好，於2015年4月16日被釋放。今日，劉鼎勳接受老友陳慎芝訪問，講述當年做案經過。
陳：我想問一個問題，你同張子強點樣認識
劉：最早時，因為佢鍾意車，亦都玩車，而我有個細佬喺賽車界有啲名，攞咗好多獎項，於是因為車而結緣認識，佢就成日嚟幫襯，之前都認識佢，但當時仲未就熟絡，直至佢經常嚟餐廳時就變得好熟絡。
陳：點解會泊埋去做呢單嘢？
劉：佢係一個智慧好高既人，每一部分都想搵最TOP嘅人。我誠信好，唔會見利忘義，所以就負責錢銀方面。
陳：張子強點解會鎖定十大富豪？
劉；首先佢個人唔會做濕碎嘢，一啲零零碎碎嘅嘢佢唔會做，佢覺得無價值，唔需要做啲咁嘅嘢。第二，佢最重點係因為譬如陳生你咁樣，我攞咗你件西裝，裡面仲有衫著，對你嘅損害唔係咁大。當然佢同你剛才講嘅富豪唔係有咩仇恨，不過佢自己內心覺得，對佢嚟講仲承受得起。
陳：當年你綁咗李生個仔，我想問，有冇虐待過佢？
劉：無，因為當時李生好大度，你咁好，我哋都會好好，佢真係做大事嘅人，好有誠信，我哋收咗錢，仲點會虐待佢？
陳：綁架咗李生個仔，收埋喺邊？點解唔報警？
劉：喺新界一個好隱蔽嘅地方，當時李生唔係明報警，會影響到佢嘅生意，包括公司所有業務。第二樣係我個人估計嘅，十億三千八百萬對於佢哋嚟講唔係天文數字，對佢嚟講係大數字，但不致於天文數字。
陳：當年綁架郭生，佢太太出嚟傾嘅時候討價還價，令你哋好唔開心，你哋好似有虐待佢喎？
劉：當時佢係一而再咁拖拖拉拉，正常情況下，我哋梗係要畀番啲適當壓力對方，不過都係輕輕咁錫啫，唔係好嚴重嘅。
有指當時郭炳湘被鎖在小木箱10日，飲食和大小二便都要在木箱內解決，事後有指郭炳湘患上創傷後遺症。
陳：我知道郭生嘅紅顏知己出嚟同你傾偈，叫你哋唔好虐待郭生？
劉：佢既然肯出嚟傾，畀足錢，我哋點會虐待佢，我哋目的都係搵錢啫，既然錢已經到手，我哋仲點會搞佢呢？
郭炳湘雖然未有離婚，但跟紅顏知己唐錦馨一直交往，有指老婆李天穎一直獲郭老太力挺，定下針對唐錦馨既十一條家規，禁止唐錦馨踏足新地和大宅，甚至阻止她插手新地一切的生意業務。
去年10月，郭炳湘離世，有指紅顏知己唐錦馨，在郭炳湘入院後一直未獲准探望，未能見最後一面。
陳：張子強成功將郭生同李生個仔綁架，點解仲唔收手？
劉：佢重覆講，佢覺得呢啲人咁有錢，攞佢哋一小部分唔會係咁大傷害，加上佢咁多行為都無流過一滴血，佢好有信心、好有計劃，做得好完美。另外佢個人心態，形容自己等於一位攀山者，希望每一次都去到一個高峰，再者，做完之後都係重複，佢無傷過任何人，無流過血，而對呢啲人嘅損失唔係咁大，佢哋仲承受得起。我都同佢講笑，你呢個攀山者想爬到去邊個山頭？佢話都已經無得再去，所以佢唔會不斷咁繼續落去，但佢仲未停，可能或者再攀多一次山。
陳：以我所知，喺澳門某富豪你哋已經鎖咗做目標，但最後點解無成功做到呢？
劉：做呢啲事唔能夠咁倉促，我哋會好好部署，會有人去踩線，即係去攞點。但係去攞嘅人畀巡街嘅軍隊警員登記身份證，但係我哋意識到唔係登記咁簡單，因為啲人唔喺嗰度住，唔係嗰度工作，又無朋友住喺度，嗰啲係高尚地方，咁點會出現呢？古惑仔術語講句，聞到味，所以我哋擱置咗。
陳：除咗綁架之外，仲有冇做過其他嘢？
劉：我諗我哋做嘅嘢已經算好大，無理由從大事做番轉頭。
陳：李生個仔件事，葉繼歡原本有份，點解唔見到佢呢？
劉：呢個係最佳組合，喺當時社會同江湖上嚟講，但臨行動前一晚，佢哋偷渡上碼頭時，被兩名巡警截查，因為佢哋唔可以被警方查身份證，所有人即時掹槍指住兩位警察，當時已經將警察繳械。但為咗一念之仁，當時放咗佢哋走，當時張子強葉繼歡都話畀佢哋走啦，佢哋只係打份工啫，已經繳械，對自己無威脅，所以就畀佢哋離開。
陳：即係張子強在場？
劉：在場。
陳：呢個從來無人知，我而家先知道。
劉：點知兩個警察返轉頭執返支槍喺好遠距離開槍，葉繼歡中槍被捕，所以就參與唔到事件。
陳：我想知道軍火同炸藥點樣運嚟？
劉：一部分喺大陸，就係呢單案作第三被告，佢負責運啲槍枝，搵子彈催淚彈，其他嗰啲微衝、 AK、 嗰樽炸藥就係我同其他人傾番嚟。
陳：我知道當時炸藥數量有好多。
劉：我哋要求一噸，但嚟咗八百幾公斤，都接近一噸。
陳：有八百公斤炸藥，二千支雷管。你哋係咪諗住去救葉繼歡？
劉：呢啲最基本嘢一定要準備好，係必時之需，唔通買返嚟玩咩，攞嚟燒煙花咩。當然係有大計劃啦，你話係咪救葉繼歡呢，就唔係咁方便講喇，呢啲事已經過去咗。
獄中17年，現年68歲的劉鼎勳自言為所做一切，感到十分後悔。
陳：如果張子強同埋你，而家仲係逍遙法外，你有咩睇法？
劉：我睇都唔可能，尤其而家科技愈嚟愈發達，法治愈嚟愈透明，唔好話咁大件事，就算犯咗小案件而家都走唔甩。所以我喺順便呼籲一下，嚟緊的青年人，我哋下一代，希望佢哋珍惜而家我哋喺法治安全既地方生活，要奉公守法。
立即下載APP，精彩內容壹手掌握
如對會員訂閱制有遇到任何問題或意見，你可以致電 2623 9985，或電郵聯絡客戶服務主任cs@nextdigital.com.hk，我們定當盡力協助！
來源 source: http://nextplus.nextmedia.com
|
鍾意就快D Share啦！
|
|
|