梁佩瑚，89年港姐季軍，15年認識蒙古地產商人郭雲飛，拍拖8個月閃嫁，46歲那年告別盛女生涯。
人的煩惱離不開事業與感情，現年48歲的她，人生路好曲折，選港姐後入行做藝員，因要出席公司飯局，卻被導演譏：「快啲去接客。」不懂埋堆的她逃離娛樂圈，用了6年時間考取律師，但最後走去寫愛情小說；感情上遇過兩次愛情騙子，幸最終遇上命中注定的老公。
日前梁佩瑚在尖沙嘴接受《蘋果》專訪，有心形嘴的她樣子甜美，但小時候卻似足男仔頭：「5歲媽咪走咗，我性格好男仔頭，家姐由細到大好老正、好乖，老竇知道屋企有乜被破壞，第一個捉我去鬧。」男仔頭的她，長大了卻去選港姐，「因為細個有聽人稱讚我：『你都幾靚喎！』讀書都有男同學追求我，其實選港姐之前，好想做模特兒，因為覺得自己高，但send好多相去雜誌應徵冇人睬我，結果有年放暑假冇嘢做，老竇叫我去選港姐，佢做我提名人。」
89年梁佩瑚獲港姐季軍，冠軍是陳法蓉，由當初選港姐傳爭衫、到3年前梁佩瑚大爆陳法蓉是大話精，30年來兩女似水火不容，當年輸給對方有否唔開心？梁佩瑚說：「冇，我覺得呢啲係講笑，從來冇呢樣嘢，我真係去玩，冇諗得定唔得，女仔多嘅地方就多是非，可能我又唔埋堆，真正熟只有3、4個女仔，入到決賽只有翁維德，佢性格又好直。」跟陳法蓉真的不和？她說：「哎呀，呢啲咁不知所謂嘅嘢唔好講啦，人生總有好多經歷，亦都會做錯嘢，有時言者無心聽者有意。我覺得同朋友之間，都會發生呢啲事，何況唔熟嘅人呢。」
入行後，梁佩瑚拍過劇集《同居三人組》、《愛生事家庭》，還有電影《七月十四》、《新英雄本色》等，02年開始淡出娛樂圈，「其實嗰個年代真係要埋堆，同周邊人打好關係對發展有好處冇壞處，奈何我份人好直，有嗰句講嗰句，見到有嘢唔啱即刻鬧，唔知道已經得罪好多人，我唔鍾意咁樣，所以離開。」當年在娛樂圈得罪好多人？她說：「又冇喎，我都算好好彩，身邊鄧萃雯、娥姐（商天娥）知道我細個，佢哋會教我，佢哋講嘢都好直，明白我唔係心地壞搞事。」
當年心直口快的她，經常睇唔過眼要出聲：「選完港姐，第一、二年有時要去同阿Sir（邵逸夫）、TVB股東食飯，有次我拍嘢，人事部講咗我要早放，要食飯定去見商戶，跟住有個導演竟然話：『快啲去接客啦你！』我換緊衫，好嬲，拉開簾：『你咁樣講嘢有冇搞錯？』我唔係做呢啲嘢，點解話人去接客，好差，跟住我去投訴佢，之後佢同我講唔好意思，而家諗番，佢當然唔好，但我係咪要咁嘮嘈呢？但我嗰刻真係好嬲。」對於娛樂圈用性交易換取工作的傳聞，梁佩瑚說：「呢啲傳聞真係唔知，冇人問過我，可能唔吸引。」
在娛樂圈浮沉十多年後，她決定要離開：「我覺得自己發展有限，早一屆有李嘉欣超靚，後一屆有袁詠儀超識做戲，呢啲好標青嘅人出晒嚟，你仲喺度做乜呢，慢慢做落去又點呢，睇唔到會有一個好出眾機會。之後我做過marketing，因為我冇讀過大學，只係高中，做做吓覺得應該要讀多啲書，冇學過真係唔識，包括law，所以選擇讀法律，嗰陣想做律師，啲人成日話我嘴招招最啱做律師。」
前後花了6年時間考到律師牌，但梁佩瑚結果冇選擇做律師：「我覺得我嘅人生走咗好多冤枉路，乜都試吓，試完發覺唔鍾意，因為我讀法律時，係想做一個正義嘅人，但考牌時讀律師守則，發現自己唔可能做到包青天，除非我入到律政署，否則做民事案，係為客人利益着想為主題，雄心有少少插水，咁啱嗰時開始寫小說，上到銷量榜，畀到好好藉口自己，一年500個律師出嚟，但做到上十大暢銷榜嘅小說人，喂，冇幾多個喎，所以去寫書，型啲雖然我已經做咗人妻，但我仲有一個夢想，好希望我嘅小說可以拍成影像，大電影可能渺茫啲，因為成本好貴，網絡電影都好，如果做埋導演，可以圓導演夢，我就開心啦。」
撰文：余燕儀
攝影：沈健程
攝錄：馮嘉銘
場地：Harlan's (The ONE)
-----------------------------
7月4日起 《蘋果動新聞》只限升級壹會員閱覽
繼續撐蘋果！
https://hk.adai.ly/e/iIRREmuwDX
|
鍾意就快D Share啦！
|
|
|
