若果你經過觀塘廣場這間小店，或會有機會碰見李雨陽。身形高大的他，或會早上七時出現，賣燒賣點心。
憑N年前無綫暑期特別劇《四葉草》出身的李雨陽，試過工作量愈來愈少，為生活欠下40萬卡數，不過香港人執生能力強，他很快還清債項。離開無綫轉投港視，但臨門一腳，又遇上港視攞唔到牌。為生活，李雨陽放下身段，兼職賣原味雞。
結婚唔夠兩年，老婆誕下兒子小芝麻，無債一身輕的李雨陽，早兩個月前，又跟太太和幾個朋友夾份，在觀塘廣場開店賣點心蒸飯串燒等小食。
「其實係幾個媽咪一齊搞呢間小食店，佢哋好想將媽咪煮嘢食味道帶畀啲返工上班一族。我哋蒸飯、點心全部都冇味精，其他好似泰式雞奕尖，都好受歡迎。」他說。
雖然係老闆身份，不過他要輪更返早班看鋪：「我試過朝早7點嚟開檔，到下午2、3點走人。有時就會3點到，大概8、9點走。但如果出面有嘢做，就唔可以返鋪頭幫手。」
身高六呎多，李雨陽通常負責收鋪前的清潔工作，事關他不忍心看要太太洗碗碟，他說：「我咁高又要彎身洗碗好辛苦，仲要每次洗成一粒鐘。比起賣雞，呢度辛苦好多，賣雞都係送貨收貨，乾淨俐落好多。」
幕前人走去賣小食，李雨陽沒有半點不習慣，更自覺十分適合：「我唔怕同人傾偈，面皮又幾厚，試過有人經過，問我係咪做電視，我話係，仲自我介紹，叫佢哋多多支持。」
表面辛苦，不過李雨陽笑住表示，只要回家看到可愛兒子，即時心甜開心晒：「為咗個家，返屋企見到嗰仔，就覺得咩都值得。」 詳情：http://bit.ly/2YBCug0
來源 source: http://nextplus.nextmedia.com
|
鍾意就快D Share啦！
|
|
|
