資深演員李兆基上月2日因肝癌擴散至肺部病逝，終年69歲，基嫂邱巧貞、陳慎芝昨日為李兆基於鑽石山殯儀館設靈，以基督教儀式進行，今早10時進行大殮。
好友陳慎芝及顏汘汶早上9時抵達，基嫂亦一早到靈堂為亡夫打點身後事，9時半完成儀式，白色棺木移送出靈堂，基嫂抱着亡夫遺照，步上靈車，遺體移到鑽石山火葬場火化，顏汘汶亦到火葬場禮堂送別好友，基嫂步出時心情平復，跟親友閒聊幾句。
顏汘汶稱自己是基哥帶入行拍電影，問到二人相處最深刻回憶，她說：「係舞獅，因為自細就好驚人舞獅，基哥成日有好多活動去花炮會，咁現場係有人舞獅，基哥知道我驚之後，成日安排我參加，基哥鬧我，叫我一定要克服，同我講你做呢行，人哋有時要剪綵點睛咁點算，呢一個就係自己同基哥最深刻嘅事。」
她笑言許多人覺得基哥又惡又cool，續道：「對住基哥係多一份尊重，喺佢面前都唔會玩得太癲，講笑都唔敢去得太盡，基哥嗰時都睇住好多亞視藝人，有錢齊齊搵，絕對有義氣，後期我哋都有微信聯絡，試過幾次想約佢出嚟食飯，但係基哥有時好硬頸，可能要覆診都唔會講，基嫂都叫佢同我講聲就得，好在基哥好聽基嫂話，咁就一而再再而三押後，都遺憾見唔到佢，如果基嫂第時有咩需要，我哋喺能力範圍內都會幫佢。」
陳慎芝指在喪禮上見到許多有情有義的畫面，好似杜琪峯、劉偉強、黃秋生、徐錦江及羅家英昨日都到殯儀館送別好友，所以代表基哥多謝大家，他說：「要勸告年輕人唔好吸毒，因為當你戒毒，隔咗好多年之後，亦會有好多後遺症出現，好似肝癌及肺癌，我嘅學生都有問我驚唔驚，我都話其實冇得驚，自己戒咗毒四十幾年，活到71歲，覺得已經賺咗，希望今次畀到一個訊息給年輕人，同埋要孝順父母，有一次見到基哥嘅家姐同細佬，大家見面好似陌路人咁，甚至我媽當年見到我都唔會打招呼，自從戒毒之後，大家見面係開心咗，媽咪知我戒毒拎到獎，佢都好開心周圍同人講。」
此外，陳慎芝讚秋生有情有義，他說：「今次見秋生有心嚟，覺得好感動，因為佢平時份人睇嚟好有個性，不過今日見佢現身都覺得佢係有情有義。」基哥骨灰會安放於鑽石山火葬場骨灰龕位。
|
鍾意就快D Share啦！
|
|
|
