掃呢頁CODE去手機

2019年10月24日 星期四

【重整人生】楊瑞麟與無綫結束32年合作關係 感恩生活仍可以有選擇 __,無綫,

攝影:沈健程
現年57歲、在87年因參加《全能司儀比賽》奪得冠軍後加入TVB的楊瑞麟,上月25號在毫無先兆的情況下離開無綫,離開原因很簡單,只為了重整自己的人生。相 ...


現年57歲、在87年因參加《全能司儀比賽》奪得冠軍後加入TVB的楊瑞麟,上月25號在毫無先兆的情況下離開無綫,離開原因很簡單,只為了重整自己的人生。

相關新聞:【走下又一個】一台獨大影響生態 半百綠葉演員相繼心灰離巢



日前楊瑞麟在尖沙嘴接受《蘋果》訪問,笑問畢竟已經不是年輕人,何解會有這個決定?他笑說:「其實係有幾個原因,一方面真係時間都差唔多,由我當年參加司儀比賽到而家,差唔多有32年,坦白講我係好鍾意拍劇,但係仲會唔會有呢啲機會,可以拍到一個自己滿意又鍾意嘅角色呢?而當呢個角色完咗,又會唔會有其他機會呢?我自己係一個唔識搲撈嘅人,就算真係去搲,監製唔會專登畀啲唔好嘅角色你去做,但係亦唔會係一啲可以滿足你過戲癮嘅角色。或者你會話有啲嘢估唔到,可能過1、2年會有啲好嘅角色畀你去做,或者會係,但係我喺呢度咁多年,而家環境同以前唔同,多咗好多限制。」



楊瑞麟表示:「呢幾年仲會睇到做好多網絡上面嘅嘢,好似OTT轉播,希望平台拉闊啲,呢啲新嘢公司會搵藝員同事幫,不過佢會搵一啲後生啲、當時得令啲,又或者配合到產品層面嘅人幫手,冇可能將一啲時間嘅產品,搵一個60、70歲嘅人幫手,慢慢會而家嘅製作情況、環境同以前都好唔同,所以不如停一停。雖然出面嘅環境唔理想,我係冇期待,但係我有一個信念,係你嘅就係你。」

相關新聞:【真心欣賞】楊瑞麟司儀比賽攞冠軍:好怕人哋話我贏咗黃子華



楊瑞麟還說:「第二個情況,我同TVB只係暫停咗個關係,但係唔難保將來佢會搵我做嘢,公司只要覺得你值,任何嘢都會發生,我唔覺得因為合約會影響最終嘅決定,如果最後公司真係冇搵(我),咪證明你係冇嘢值得公司搵,咁咪要接受囉,亦證明你留喺度都冇乜用。我嘅心態係好自在,如果公司覺得我係值吓錢,有啲角色啱我做,隨時可以搵我,我好樂意去接受,如果呢樣嘢係冇發生,就算我仲存在喺呢間公司,都係唔會發生。當然如果係啱啱入行,咁一定會等吓,但係我入咗行30幾年,年紀又唔細,不如行返出嚟,等個人自在啲,我知道有啲嘢係自己計算唔到。」



屈指一算,楊瑞麟在32年的演藝生涯上,曾經拍了近140套劇集,不過大多數角色未算有很大發揮空間,未知會否因未有代表作而覺得不完美?他說:「人生係有好多唔完美,尤其係喺演藝行業,有邊啲人真係可以有代表作?當然有極少嘅人係有無數嘅代表作。對我嚟講已經好開心,有幾個角色已經係享受到,得到大家認同,我覺得已經有好大滿足。」他還說:「但係其實都要講好感恩,生活仲係可以有選擇,呢樣真係唔係必然,有啲人喺生活上仲係好有需要,唔係每個人都可以搵到你嘅足夠金錢經濟,又可以做到自己想做嘅工作,又滿足到你嘅生活,喺呢個圈子又真係有幾多呢類人呢?我相信真係少到幾乎冇人有,有啲叫生活得到已經好唔錯,我亦相信有唔少人未必有太多選擇,喺呢個行業入面,依然可以畀佢存留嘅話,相信佢都選擇繼續,出面未必有太多嘢畀佢選擇,始終要解決糊口嘅問題。」



他更笑說:「自己唔係好大食,食好少就夠,暫時都叫做可以有兩碗飯食,所以先可以做呢個決定。如果我真係好擔心會冇飯食嘅時候,我諗係唔可以有呢個決定,正所謂大樹好遮蔭,唔好講話有冇機會,喺棵樹下面,個人係真係好安心,大家可能都有呢種體會,所以我覺得係好合理,只不過我選擇脫離呢個現狀,將來會點係唔會知,客觀地睇係唔理想,咪即管睇吓點,我都會同啲朋友傾吓偈,了解吓而家嘅狀態,我都知係唔會好,但係依然有人開不同嘅劇集,輪唔輪到我,唔講喇,不過我都叻咗,我唔係好鍾意拍膊頭,但係我都會話:『明白,如果啱就搵我喇!』」



楊瑞麟直言以前從來都未試講呢類說話:「我唔講唔係因為我招積,喺無綫唔講,勉強仲可以,因為仲有好多機會,畢竟我仲係當中嘅人,亦都有個藝員調配組,有人知道你大概嘅情況,但係因為而家唔講,係唔會有機會再講,我行咗出嚟,唔出聲係唔會有人知,所以真係要畀人知道你嘅狀態,多番啲你嘅資料先可以。」對於工作上的安排,他說:「我冇諗過任何嘢,但係會畀自己開放少少,當然希望能夠有機會繼續拍嘢,不過無論係時勢關係,抑或係其他原因,係唔知嘅,都嘗試話畀人哋(知)自己係available ,我都會喺教會團體分享吓自己體驗,做吓義工。」



撰文:唐琛悠

場地提供:鉄板焼海賀(The ONE)



-----------------------------



-----------------------------



攝影:沈健程 現年57歲的楊瑞麟,上月25號在毫無先兆的情況下離開無綫。 現年57歲的楊瑞麟,上月25號在毫無先兆的情況下離開無綫。
楊瑞麟未有為將來訂下計劃。

楊瑞麟未有為將來訂下計劃。
 楊瑞麟在無綫工作32年,拍了接近150套劇集。(資料圖片)

楊瑞麟在無綫工作32年,拍了接近150套劇集。(資料圖片)
 楊瑞麟在《大帥哥》飾演村長一角。 (資料圖片)

楊瑞麟在《大帥哥》飾演村長一角。 (資料圖片)
楊瑞麟未有因未有代表作而失望,他覺得人生必定有不完美。

楊瑞麟未有因未有代表作而失望,他覺得人生必定有不完美。
楊瑞麟在32年的演藝生涯上,曾經拍了近140套劇集。

楊瑞麟在32年的演藝生涯上,曾經拍了近140套劇集。
楊瑞麟笑說:「如果我真係好擔心會冇飯食嘅時候,我諗係唔可以有呢個決定。」

楊瑞麟笑說:「如果我真係好擔心會冇飯食嘅時候,我諗係唔可以有呢個決定。」

鍾意就快D Share啦!